Տարածաշրջանային ուսումնասիրությունների կենտրոնի ղեկավար, քաղաքագետ Ռիչարդ Կիրակոսյանն այսօր «Հենարան» ակումբում ` ներկայացրեց իր տեսակետը վերջին շրջանի արտաքին քաղաքական կարևոր իրադարձությունների շուրջ:
Անդրադառնալով Ֆրանսիայի խորհրդարանի Վերին պալատի` Սենատի ընդունած որոշմանը, որով Ֆրանսիայի կողմից ընդունվեց ցեղասպանությունների ժխտումը քրեականացնելու մասին օրինագիծը,
Ռ.Կիրակոսյանը առանձնացրեց չորս կետեր:
Ըստ նրա, Հայաստանի համար ազդեցությունը պարզ դարձավ երեկ, դա երեք կիլոգրամանոց` Սարկոզի անվանված երեխան էր: «Սա ցույց է տալիս քվեարկության կարևորությունը Հայաստանի համար»,- ասաց նա:
Անդրադառնալով Թուրքիայի վրա Սենատի քվեարկության ազդեցությանը` նկատեց, որ այն շատ կարևոր մեսիջ է պարունակում` Ցեղասպանության ճանաչումը միջազգային գործընթաց է, որը չի կարող կանգ առնել.
«Շատ կարևոր է, թե ինչ է տեղի ունենում այսօր Թուրքիայի ներսում: Քվեարկությունը տեղի ունեցավ Հրանտ Դինքի սպանության տարելիցից մի քանի օր հետո»,- հիշեցրեց նա:
Ռ.Կիրակոսյանի կարծիքով` այժմ կարևոր է, թե ինչպես Թուրքիան կփոխվի: Այս երկիրը կարող է հայացքն ուղղել Արևմուտքից Արևելք և կարող է շատ արագ վերադառնալ ֆուտբոլային դիվանագիտությանը:
Եվ վերջինը` Թուրքիայի չափազանց մեծ արձագանքը խնդիրն ավելի մեծացրեց, քանի որ Սենատի միակ քվեարկությունն էր, որը հեռարձակվում էր ամբողջ աշխարհի առաջատար լրատվամիջոցներով:
«Այլ կերպ ասած` Թուրքիան ինքն է հենց իրեն վնասում` չափազանց մեծ արձագանք տալով որևէ գործընթացի: Հաջորդը` Թուրքիան փաստարկ բերեց, որ ոչ մի երրորդ երկիր չպետք է ներգրավվի հայ-թուրքական գործընթացի մեջ: Ըստ թուրքական տրամաբանության` Ադրբեջանն էլ իրավունք չունի մտնել հայ-թուրքական հարաբերությունների մեջ. սա ևս Թուրքիայի սխալն է»: