Տարածաշրջանային ուսումնասիրությունների կենտրոնի ղեկավար, քաղաքագետ Ռիչարդ Կիրակոսյանի կարծիքով` Սոչիի եռակողմ հանդիպումը, ըստ էության, կլինի Մեդվեդևի հովանու ներքո վերջին հանդիպումը:
Այս մասին նա հայտարարեց այսօր «Հենարան» ակումբում հրավիրված ասուլիսի ժամանակ: Ըստ Ռ.Կիրակոսյանի, Պուտինի օրոք կփոխվի ՌԴ քաղաքականությունը ԼՂ կարգավորման գործընթացի նկատմամբ, և Պուտինի վարած քաղաքականությունը կտարբերվի նրանից, որն առկա էր Մեդվեդևի պաշտոնավարման ընթացքում:
«Ամենայն հավանականությամբ Պուտինը ավելի քիչ ժամանակ կունենա սպասելու` հաշվի առնելով այն, որ Սերժ Սարգսյանի և Պուտինի միջև հարաբերությունները ոչ այնքան լավ են, որքան Քոչարյան-Պուտին ընկերական հարաբերությունները: Այս առումով Պուտինի ճնշումները Հայաստանի նկատմամբ այնքան էլ արդյունավետ չեն լինի: Այսինքն` Պուտինի ջանքերը` ճնշումներ գործադրել Հայաստանի նկատմամբ, արդյունավետ չեն լինի»,-ասաց փորձագետը:
Նրա գնահատմամբ` Սոչիի հանդիպման արդյունքում ամրագրվեց, որ Ադրբեջանը սպառել է պատերազմի վերսկսման ռեսուրսները: Անդրադառնալով ՌԴ ԱԳ նախարարի հայտարարությանը Սոչիի հանդիպումից հետո` նա նկատեց, որ Ադրբեջանի դիվանագիտական քաղաքականությունը մաքսիմալիստական է:
Պատասխանելով հարցին, թե ինչու Թուրքիան կարող է այժմ վերադառնալ ֆուտբոլային դիվանագիտությանը, Ռ.Կիրակոսյանն ասաց, որ Թուրքիան կարող է վերադառնալ այդ գործընթացին, որպեսզի կարողանա թուլացնել Ցեղասպանության ճանաչման գործընթացն աշխարհում, և հաջորդը` Թուրքիան շատ ծանրաբեռնված է և բազմաթիվ այլ խնդիրներով ևս:
«Հայաստանի համբերությունն էլ անսահման չէ: Հայաստանի` առանց նախապայմանների քաղաքականությունը կարող է փոխվել և դառնալ պահանջկոտ, բոլոր ճնշումները Թուրքիայի ուղղությամբ են»,- հայտարարեց Ռ. Կիրակոսյանը:
