ԱՄՆ Կոնգրեսի Ներկայացուցիչների պալատի նախկին խոսնակ, ԱՄՆ նախագահի թեկնածու, հանրապետական Նյուտոն Գինգրիչը Ֆլորիդայի ընտրողների հետ հանդիպման ժամանակ հայտարարել էր, որ ԱՄՆ պետք է 2020 թվականին սեփական բազան ունենա Լուսնի վրա: Այս մասին հայտնում է РИА Новости-ն:
Տիեզերքի թեման Ֆլորիդայում արշավի գլխավոր թեման է, քանի որ հենց այստեղ է տեղակայված տիեզերակայանը, որտեղից ուղևորվում են տիեզերանավերը:
«Նախագահական իմ երկրորդ ժամկետի ավարտին Լուսնի վրա լինելու է մշտական բազա, և այն ամերիկյան է լինելու: Երկրի մոտ ուղեծրում մենք կազմակերպելու ենք առևտրային հետազոտման, զբոսաշրջության և տիեզերական արդյունաբերության գործունեություն, այդ պատճառով էլ մենք մտադիր ենք փորձ կուտակել տիեզերքում, որպեսզի չինացիները և ռուսները նույնիսկ չկարողանան մոտենալ այդ մակարդակին (տիեզերական ոլորտի զարգացման.- 1in.am)»,-ասել է Գինգրիչը:
Նա խոստացել է վերացնել «բյուրոկրատիան NASA-ում» և աջակցել մասնավոր ներդրումներին տիեզերքի յուրացման դեպքում, եթե ինքը դառնա նախագահ: Գինգրիչը միևնույն ժամանակ չի պարզաբանել, թե ինչ նախագծեր է նա առաջարկելու մասնավոր անձանց, և ինչում է կայանում բյուրակրատիայի դեմ պայքարը:
Ֆլորիդայում նախնական ընտությունները տեղի են ունենալու հունվարի 31-ին: