Ռուսաստանի ԱԳՆ-ի պաշտոնական կայքի փոխանցմամբ՝ երեկ Մոսկվայում տեղի է ունեցել ռուս-թուրքական համագործակցության բարձր խորհրդի ծրագրավորման միավորված ռազմավարական խմբի երկրորդ հանդիպումը, որը նախագահել են Ռուսաստանի ու Թուրքիայի արտգործնախարարներ Սերգեյ Լավրովն ու Ահմեդ Դավութօղլուն։
Ռուսաստանի և Թուրքիայի կառավարությունների կողմից ստեղծված այս հատուկ կառույցը միտված է երկու երկրների միջև համագործակցությունն է՛լ ավելի արդյունավետ դարձնելուն։ Այս խորհրդի ղեկավարներն են երկու երկրների վարչապետերը։
Նիստի արդյունքում ստորագրվել է համատեղ հռչակագիր, որն ընդգրկում է երկկողմանի հարաբերությունների ողջ շրջանակը և բաղկացած է 30 կետից։ 26-րդ կետը վերաբերում է Ղարաբաղյան հակամարտության կարգավորմանը. «Կողմերը շահագրգռվածություն են հայտնել Ղարաբաղյան հակամարտության շուտափույթ կարգավորմամբ։
Հույս է հայտնվել, որ Ղարաբաղյան հակամարտության կարգավորման ուղղությամբ ԵԱՀԿ Մինսկի խմբի միջնորդությամբ Հայաստանի ու Ադրբեջանի իրականացրած աշխատանքը շուտով կտա իր արդյունքը։ Նախարարները հաստատել են ստատուս-քվոյի պահպանման անընդունելիությունը՝ փաստելով, որ Ղարաբաղյան հակամարտության խաղաղ կարգավորմանը հնարավոր է հասնել այն սկզբունքների հիման վրա, որոնք արտացոլված են ՄԱԿ-ի կանոնադրությունում, Հելսինկյան Եզրափակիչ ակտում, ինչպես նաև ԵԱՀԿ Մինսկի խմբի համանախագահող երկրների ղեկավարների կողմից 2009 թվականի հուլիսին Ակվիլայում, 2010 թվականի հունիսին Մուսկոկում և 2011 թվականի մայիսին Դովիլում հնչեցրած համատեղ հայտարարություններում։
Կողմերը հաստատել են, որ բանակցային գործընթացին լրացուցիչ ազդակ է հաղորդել 2012 թվականի հունվարի 23-ին Սոչիում Հայաստանի, Ադրբեջանի ու Ռուսաստանի նախագահների արած համատեղ հայտարարությունը։ Թուրքիան ու Ռուսաստանը հաստատել են իրենց մտադրությունը՝ սեփական պոտենցիալը հակամարտության գոտում առկա իրավիճակի վրա կյայունացնող ազդեցություն թողնելու հարցում գործածելու համար»։