ԱՄՆ ֆինանսների նախարար Թիմոթի Գայթները վստահություն է հայտնել, որ Բարաք Օբամայի վերընտրվելու դեպքում չի մնալու իր պաշտոնում: Ինչպես հայտնում է Reuters գործակալությունը, Գայթները նման հայտարարություն է արել Bloomberg Television-ի եթերում:
Նախարարը հայտարարել է, թե չի կասկածում, որ Օբաման հաղթելու է նախագահական ընտրություններում, սակայն քիչ հավանական է անվանել այն, որ նախագահը իրեն կառաջարկի մնալ ֆինանսների նախարարի պաշտոնում: Գայթները նաև նշել է, որ, հնարավոր է, մնա Օբամայի թիմում, բայց այլ պաշտոն ստանձնի:
Թիմոթի Գայթները ֆինանսների նախարար է նշանակվել 2009 թվականին: Այս պահին նա Բարաք Օբամայի տնտեսական թիմից միակ անդամն է, որն իր պաշտոնում է գործող վարչակազմի ձևավորումից ի վեր:
2011 թվականի օգոստոսին` պետական պարտքի առաստաղը բաձրացնելու անհրաժեշտությունից առաջացած քաղաքական ճգնաժամի հաղթահարումից անմիջապես հետո, Գայթները պաշտոնից հեռանալու ցանկություն էր հայտնել: Այդ ժամանակ Օբաման նախարարից խնդրել էր մնալ պաշտոնում: