«168 ժամ»-ը գրում է.
«Ազգային վիճակագրական ծառայությունը երեկ հրապարակել է 2011 թվականի նախնական մակրոտնտեսական ցուցանիշները, որոնց համաձայն, տնտեսական ակտիվության ցուցանիշը տարվա կտրվածքով կազմել է 5,9%: Այլ կերպ ասած՝ տնտեսական աճի ցուցանիշը, ըստ պաշտոնական վիճակագրության, գրեթե 6% է:
ՀՀ նախկին վարչապետ Հրանտ Բագրատյանը, սակայն, ԱՎԾ-ի ներկայացրած թվերը համարում է պարզապես բլեֆ: Բագրատյանի խոսքով, օրինակ, ծառայությունների ոլորտի աճ գրանցվել է այն բանի շնորհիվ, որ դրանում ներառվել է նաև ԱՊՊԱ-ն, մինչդեռ ԱՊՊԱ-ն իրականում ծախս է և չի կարող արտադրանք համարվել: Բացի այդ, ըստ նախկին վարչապետի, եթե հանենք նաև հանքարդյունաբերության ոլորտը, ապա պարզ կդառնա, որ աճը զրոյական է:
«Մյուս բլեֆը՝ անցած հոկտեմբերին մեզ ասացին, թե տնտեսական ակտիվության ցուցանիշը նախորդ տարվա հոկտեմբերի համեմատ 3 % է: Այսօր Վիճվարչության կայքում խմբագրված տարբերակում ունենք 4,1: Նոյեմբերը 2,4 էր, հիմա՝ 3,1:
Ո՛րն է ճիշտը: Անցած տարի հայտարարվեց, թե ՀՆԱ-ի աճը 2,6 % է, հետո գրեցին՝ 2,1 %, Համաշխարհային բանկը տվեց 1 %: Հիմա սպասենք, թե այս ակտիվության 5,9 տոկոսը 3-4 ամիս հետո ՀԲ կայքում ի՞նչ կդառնա:
Խոսքս ուղղում եմ ՀՀԿ-ին՝ բարեկամներ, ձեր տնտեսագիտական թիմը հիշեցնում է կատվի: Ինչպես գցում ես, ոտքի վրա է մնում: Զգուշացեք՝ կվառվեք: Վախենամ հանրապետությունն էլ ձեզ հետ վառեք: Ձեզ պետք չե՞ն ճիշտ թվերը: Խոսքս ուղղում եմ ՀՀ ղեկավարին՝ ո՞ւմ են պետք այս բլեֆները: Մենք ինչքա՞ն պիտի այսքան խաղանք»,- ասել է Հրանտ Բագրատյանը: