Կենտրոնական բանկի ֆինանսական դիտարկումների կենտրոնի տվյալներով, 2009թ. իրենց ներկայացվել է 102949 պարտադիր տեղեկացման հաշվետվություն, որից 72-ը եղել են կասկածելի: Իսկ 2008թ. 93 352 պարտադիր տեղեկացման հաշվետվությունից կասկածելի է եղել 37-ը: Թե այդ հաշվետվություններից քանիսի կապակցությամբ է հարուցվել քրեական գործ, եւ ինչ ընթացք են դրանք ստացել, այդ մասին ԿԲ ֆինանսական դիտարկումների կենտրոնը լռում է:
«Առաջին Լրատվականին» այսօր Հատուկ քննչական ծառայությունից փոխանցեցին, որ իրենց մոտ 2008-2010թթ. հանցավոր ճանապարհով ստացված եկամուտներն օրինականացնելու (լեգալացնելու), «փողերի լվացման» վերաբերյալ ՀՀ քրեական օրենսգրքի 190-րդ հոդվածի հատկանիշներով հաղորդումներ չեն ստացվել, նյութեր չեն նախապատրաստվել, քրեական գործեր չեն հարուցվել, չեն քննվել: «Միայն Ալեքսանդր Արզումանյանի և մյուսների վերաբերյալ թիվ 62215908 քրեական գործի շրջանակներում 12.03.08թ ՀՀ ԱԱԾ քննչական վարչությունից պահանջվել եւ ուսումնասիրվել է վերջինիս նկատմամբ նշված հոդվածով հարուցված թիվ 58205607 քրեական գործը, որը 30.08.08թ. կրկին վերադարձվել է ԱԱԾ քննչական վարչություն»,- փոխանցեցին ՀՔԾ-ից: Իսկ ԱԱԾ-ից դեռեւս չեն պատասխանել, թե քանի հաղորդում են իրենք ստացել այդ մասին, եւ ինչ ընթացք են ունեցել այդ գործերը: