Մոսկվայի և Մինսկի միջև նոր սկանդալ է հասունանում: Ռուսաստանի արտաքին գործերի նախարարությունը պահանջել է, որպեսզի Բելառուսի իշխանություններն ազատ արձակեն Ռուսաստանի քաղաքացիներին, որոնք ձերբակալվել էին Մինսկում նախագահական ընտրություններից հետո դեկտեմբերի 19-20-ը տեղի ունեցած երթերի և հանրահավաքների ժամանակ: Նրանք ստիպված բելառուսական բանտում կանցկացնեն մինչև նոր տարի, համենայնդեպս այս պահին ոչ մի փոփոխություն չկա բելառուսական իշխանությունների կողմից կայացրած որոշման մեջ, համաձայն որի՝ նրանք ենթարկվել են 10-15 օրվա վարչական կալանքի:
Պաշտոնական Մոսկվան պնդում է պահանջը իր քաղաքացիների անհապաղ ազատման վերաբերյալ: Այս մասին փոխարտգործնախարար Գրիգորի Կարասինն ասել է Մոսկվայում Բելառուսի դեսպանին: Նախօրեին Մինսկի դատարանը մերժել է 11 կալանավորվածներից 9-ի՝ վաղաժամ ազատ արձակելու վերաբերյալ խնդրանքը: Մյուս երկուսի գործերը կքննվեն դեկտեմբերի 30-ին:
Այս մասին հաղորդում է ITAR-TASS գործակալությունը: