«Հայաստան» հանրախանութի վարձակալներին «Ամերիաբանկի» ներկայացուցիչները եւ ոստիկանները թույլ չեն տվել մուտք գործել առևտրի կենտրոն։ Քիչ առաջ այս մասին «Առաջին լրատվական»-ին տեղեկացրեց «Հայրապետյան եղբայրներ» ՓԲԸ տնօրեն Փայլակ Հայրապետյանի փաստաբան Արա Զոհրաբյանը: Ըստ վերջինիս, հանրախանութի տարածքում ոստիկանության և բանկի աշխատակիցների գործողություններն եղել են անիրավաչափ ։
Այսօր կեսօրին տեղեկություն տարածվեց, ըստ որի, «Ամերիաբանկը» իր մոտ գրավադրված «Հայաստան» հանրախանութի շենքը վերցրել է իր սեփականություն։ Փաստաբանի խոսքերով հանրախանութի սեփականատերը` Փայլակ Հայրապետյանը համաձայն չէ այդ որոշման հետ և նա դիմել է դատարան: Բայց բանկը ցանկանում է առանց դատարանի վճռի վտարել այդ տարածքում աշխատող անձանց։
Արա Զոհրաբյանն ասաց, որ «Հայաստան» հանրախանութ առևտրի կենտրոնում կա նաև վարձակալ կազմակերպություն, որն անշարժ գույքի կադաստրի վկայականով ունի վարձակալության իրավունք։ «Բանկը փորձում է նաև այդ մարդկանց վտարել, իսկ մենք փորձեցինք հասկացնել, որ նրանք դրա իրավունքը չունեն, քանի որ վարձակալության պայմանագիրը չի ավարտվել»,- պարզաբանեց Ա. Զոհրաբյանը: Նա նաեւ նշեց, որ ոստիկանությունն իրավունք ունի ներխուժման դեպքերում աջակցել գործընթացին, բայց երբ ինքը ոստիկանության պետին ներկայացրել է համապատասխան բողոք և հիմնավորումներ, ինչ-որ ժամանակ անց ոստիկանությունը հեռացել է առևտրի կենտրոնից՝ տեսնելով, որ կա դատական վեճ։ Դա տեղի է ունեցել մոտ երկու ժամ առաջ, որի ընթացքում բանկի աշխատողները առևտրի կենտրոնի դուռը ներսից փակել են և վարձակալի ներկայացուցիչներին արգելել են ներս մտնել։
Ըստ Զոհրաբյանի, այդ ընթացքում վեճ է բռնկվել, որի արդյունքում ապակիներից մեկը կոտրվել է։ «Այս պահին ոստիկանությունն այնտեղ է կատարված միջադեպի առիթով, սակայն մեր կարծիքով ոստիկանության գործողություններն անիրավաչափ էին»,- ասաց փաստաբանը: ՀՀ ոստիկանությունը կատարվածի վերաբերյալ առայժմ ոչ մի պարզաբանում չի ներկայացրել: ՀՀ Ոստիկանությունի «Առաջին լրատվական»-ին ասացին, որ միջադեպի հանգամանքները դեռեւս պարզվում են։