«Արզնի կաթ» ընկերությանը ֆինանսական մեծ վնաս է հասցվել։ «Առաջին լրատվական»-ի հետ զրույցում տեղեկացրեց «Արզնի կաթ» ընկերության տնօրեն Արմեն Ջանվելյանը՝ խոսելով օրեր առաջ ընկերությունում տեղի ունեցած կողոպուտի շուրջ։
Նա նշեց, որ «Արզնի կաթ»-ից գողացվել է գումար, համակարգչային սարքավորումներ, տեխնիկա։
«Մինչև հիմա հաշվարկվում է ընկերությանը հասցված վնասը, քանի որ դեռ բացահայտվում է, որ կան պակասող իրեր։ Ընկերությունում խառնաշփոթ վիճակ է, և հինգ օր շարունակ նորանոր կողոպտված ապրանքներ են բացահայտվում»,- նշեց Ջանվելյանը՝ հավելելով, որ համապատասխան մարմինները դա գնահատել են, որպես խոշոր կողոպուտ։
Ընկերության տնօրենը ենթադրում է, որ գողերը նախապես իմացել են, թե ուր են եկել, պատահական չեն եկել և դուռը բացել։ Ըստ Ա. Ջանվելյանի՝ ընկերություն մուտք գործելը բարդ չէ, բայց նրանք ամենաբարդ ճանապարհով են մուտք գործել։ Այն հարցին, թե ինչ վնաս կհասցնի կողոպուտն ընկերությանը, պատասխանեց, որ «Արզնի կաթ»-ը դրանից չի փակվի կամ աշխատողներ չեն կրճատվի, պարզապես ֆինանսական վնաս են հասցրել։
Ընկերության տնօրենը հիշեց, որ 10 տարի առաջ նմանատիպ դեպք եղել էր, բայց փոքրամասշտաբ։ «Ես իհարկե կհետևեմ քրեական գործի բացահայտմանը, միակ հույսս ոստիկանությունն է»,- ամփոփեց ընկերության տնօրենը։
Ինչպես «Առաջին լրատվական»-ին տեղեկացրին ՀՀ ոստիկանությունից, հունվարի 20-ին ոստիկանություն հաղորդում է ստացվել «Արզնի կաթ» ընկերությունում կողոպուտի մասին։ Հունվարի 22-ին հարուցվել է քրեական գործ ՀՀ Քրեական օրենսգրքի 177-րդ հոդվածի 2-րդ մասի հատկանիշներով, կողոպուտի մանրամասները պարզվում են։ Կատարվում է նախաքննություն։