Աշխարհի տարբեր ծայրերից Դավոսի տնտեսական ֆորումում ներկայացած միլիարդատերերը ժամանակակից աշխարհի գլխավոր խնդիրը համարում են հարստության անհավասարաչափ բաշխումը: Այս մասին հաղորդում է Bloomberg գործակալությունը:
«Դավոսում հրավիրվածներից շատերը մեղադրվում են այն բանում, որ աշխարհում հավասարություն չկա,- կարծում է Oberoi Realty Ltd. ընկերության հիմնադիր Վիկաս Օբերոյը:- Ես հույս ունեմ, որ այս միջոցառումը կազմակերպվում է ոչ թե ձևի համար, այլ այն իրենից ներկայացնում է մի փոքր ավելին, քան պարզապես մեծ երեկույթ»:
Bloomberg-ի թղլթակիցը զրուցել է մի շարք գործարարների հետ, որոնք կարծում են, որ անցյալ տարի ամբողջ աշխարհը ցնցած ցույցերը նախազգուշացում են ֆինանսական էլիտայի համար: «Մենք արդեն տեսել ենք՝ ինչի կարող է հանգեցնել խնդիրներն արհամարհելը»,- հայտարարել է հնդիկ ձեռնարկատեր Ազիմ Փրեմժին:
Համաշխարհային տնտեսական ֆորումը մեկնարկել է այսօր վաղ առավոտյան: Ֆորումի գլխավոր թեման է «Մեծ տրանսֆորմացիա. Նոր մոդելների ձևավորում»:
