Թուրքական Milliyet թերթն անդրադարձել է Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի ընդունմանը.
«Ֆրանսիայի Ազգային ժողովի կողմից Հայոց ցեղասպանության հերքումը քրեականացնող օրինագծի ընդունումից հետո մենք բավական ժամանակ ունեինք կանխիչ միջոցներ ձեռնարկելու համար։ Սակայն նմանատիպ որևէ բան չարվեց։ Հենց խոսք գնաց ֆրանսիական ապրանքները բոյկոտելու մասին, Թուրքիայի արդյունաբերողների ու ձեռնարկատերերի միության նախագահ Ումիթ Բոյներն ու էկոնոմիկայի նախարար Զաֆեր Չաղլայանն անմիջապես հայտարարեցին, որ դա արդյունավետ չէ, որով և հանգստացրին Ֆրանսիային։
Արտգործնախարար Ահմեդ Դավութօղլուն հայտարարեց, թե «Դա Ֆրանսիայի համար խայտառակություն է», իսկ վարչապետ Էրդողանը սպառնաց «այլևս ոտք չդնել Ֆրանսիա»։ Սակայն այս ամենը բավական չէին հակառակ կողմին համոզելու համար։ Մեր ազգը կորցրել է իր բնազդը։ Երբ 5 տարի առաջ նմանատիպ օրենք էր ընդունում Շվեյցարիան, Թուրքիան մի քիչ հոխորտաց և արդյունքում նահանջեց։
Վերջին տարիներին, երբ օտար երկրները որոշումներ են ընդունել Ցեղասպանության մասին, մենք բավարարվել ենք միայն քննադատող ուղերձներ հղելով։ Հենց դրա համար էլ այդ երկրները չեն խուսափում Թուրքիայի դարպասը «Ցեղասպանության գոլ» խփելուց։ Նրանք գիտեն, որ մի շարք քննադատող հայտարարություններից հետո Թուրքիան ընդունելու է այդ նվաստացումը։
Ֆրանսիայի Սենատի ընդունած որոշումը թե՛ Ֆրանսիայի, թե՛ Հայաստանի հաղթանակն է։ Միջազգային արենայում մենք մեր կշռով զիջում ենք 4 միլիոնանոց Հայաստանին։ Այդպիսին է իրականությունը»։