Անցյալ տարի ամբողջ նոյեմբեր ամսին ձվի մի մասը պահեստավորվում էր, որովհետև իրացումը քիչ էր: Այս տարի ճիշտ հակառակը տեղի ունեցավ, և հնարավոր չեղավ ձու պահեստավորել: Խոսելով ձվի դիֆիցիտից՝ պարզաբանեց գյուղնախարարության անասնաբուծության և տոհմային գործերի վարչության պետ Աշոտ Հովհաննիսյանը: Իսկ ձվի դեֆիցիտի պատճառը, ըստ նրա, մինչ այդ տեղ գտած թանկացումներն էին: «Օրինակ՝ այս տարի ձավարեղենը կտրուկ թանկացավ, իսկ ձուն համեմատաբար էժան մնաց: Մինչև այս վերջերը 40 դրամ էր, և եթե վերածում ենք կիլոգրամի, ստացվում է՝ 1 կգ ձուն 650-700 դրամ է, ինչը հավասր է մեկ կգ ձավարեղենի գնին: Այսօր «գրեչկան» ավելի թանկ է, քան մեկ «յաչենյկա» ձուն: Այսինքն՝ ժողովուրդն սկսեց շատ ձու սպառել, հետևաբար ֆաբրիկաները չկարողացան ձուն պահեստավորել»,-մանրամասնեց Աշոտ Հովհաննիսյանը: Նրա խոսքերով, Հայաստանում օրական 1 միլիոն 300 հազար ձու է արտադրվում, որ այսօրվա դրությամբ անմիջապես իրացվում է: Այնինչ, հունվարից արդեն արտադրողները իրացման խնդրի առաջ են կանգնելու, և ձվի գինը 40 դրամի էլ չի հասնի: Մենք արդեն իրացման հետ կապված ենք խնդիր ունենալու: Ձուն մնալու է, գինը 40 դրամից էլ են իջեցնելու, ու այդ խնդիրը նորից առաջանալու է: «Հիմա Հայաստանում կա 900 հազար ընտանիք, եթե 900 հազարը սպառեն 1 «յաչեյկա» ձու, դա կանի 27 միլիոն ձու: Այնինչ, մենք օրական արտադրում ենք 1 միլիոն 300 հազար ձու: Այսինքն, մենք պետք է առնվազն 20 օրվա պահեստավորած ձու ունենայինք, որ այդ 27 միլիոնին բավականացներ»,- նկատեց Աշոտ Հովհանիսյանը: Իսկ մեր այն հարցին, թե արդյոք դա պատճա՞ռ է, որ, առիթից օգտվելով, ձվի գինը քառակի բարձրացեն, պատասխանեց. «Իհարկե ոչ, բայց այսօր պահանջարկն է թելադրում»: