Նախագահները և ՌԴ-ն չկարողացան համաձայնության գալ Ադրբեջանի կողմից հրահրվող շփման գծի խախտումների վերաբերյալ։ Այսօր լրագրողների հետ հանդիպման ժամանակ իր մտահոգությունը հայտնեց քաղաքագետ Ալեքսանդր Մարկարովը՝ անդրադառնալով Սոչիում տեղի ունեցած նախագահների եռակողմ հանդիպմանը։
Քաղաքագետը նշեց, որ հանդիպման արդյունքում ստացված փաստաթղթում կարելի է առանձնացնել մի քանի դրույթ։ «Առաջինը փաստաթղթի հղումն է Մոսկովյան 2008 թվականի հռչակագրին։ Տվյալ դեպքում Մոսկովյան հռչակագիրը այն հղումն է, որում կան այնպիսի տարրեր, որոնք կարևոր են ընդհանուր բանակցային գործընթացի համար։ Մեկը հիշեցնեմ. կարգավորումը նախատեսվում է միայն քաղաքական եղանակով, այսինքն՝ շեշտադրվում է բանակցային գործընթացը:
Երկրորդն այն է, որ փաստաթղթի հիմքում ընկած են միջազգային իրավունքի նորմերը, երրորդը ԵԱՀԿ ձևաչափիի պահպանումն է, և չորրորդը՝ միջազգային երաշխիքների էլեմենտը։ Տվյալ պարագայում Մոսկվայի հռչակագիրըը փաստորեն երկուսուկես տարի անց պրոյեկցիայի է ենթարկվում»,- մեկնաբանեց Ա. Մարկարովը՝ հավելելով, որ գործընթացի կմախքը պահպանվում է։
Շարունակելով խոսել փաստաթղթի մասին՝ բանախոսի մտահոգությունն այն էր, որ նախագահները բոլոր դրույթներն ընդունեցին ի գիտություն։
«Տվյալ պարագայում նախագահները և ՌԴ-ն չկարողացան համաձայնության գալ Ադրբեջանի կողմից հրահրվող շփման գծի գործողությունների հարցում »,- ընդգծեց քաղաքագետը՝ հավելելով, որ նույնիսկ այս մինիմալ քայլը չի իրականացվել։
