Ռուսաստանում ԱՄՆ նոր դեսպան Մայքլ Մաքֆոլը հայտարարել է, որ չի եկել հեղափոխություն անելու համար, այլ եկել է երկու երկրների միջև հարաբերութունների «վերբեռնման քաղաքականությունը» շարունակելու համար: «Վերբեռնման իմաստը հեղափոխության նախապատրաստումը չէ: Մենք դրանով չենք զբաղվում»,- ընդգծել է նա Коммерсант-ին տված հարցազրույցի ժամանակ:
«Դուք կարող է՝ քաղցկեղային ուռուցքների մասնագետ եք, սակայն դա չի նշանակում, որ դուք հանդես եք գալիս քաղցկեղի տարածման օգտին: Ես գիտնական եմ, քաղաքագետ և սոցիոլոգ, այլ ոչ թե պրոֆեսիոնալ հեղափոխական»,- պարզաբանել է նա:
Նման կերպ Մայքլ Մաքֆոլը մեկնաբանել է Однако հաղորդման հաղորդավար Միխայիլ Լեոնտևի հայտարարությունը, որը նրան կասկածել է Ռուսաստանում հեղափոխություն նախապատսրատելու մեջ: Դեսպանը նշել է նաև, որ երկար ժամանակ է՝ ծանոթ լրագրողի հետ և ցանկանում է հանդիպել նրա, ինչպես նաև Պետդումայում միջազգային հարցերով հանձնաժողովի ղեկավար Ալեքսեյ Պուշկովի հետ: Պատգամավորը նույնպես Մաքֆոլին կասկածել է Ռուսաստանում իշխանափոխություն նախապատրաստելու մեջ:
Թերթին տված հարցազրույցում դեսպանը մեկնաբանել է ԱՄՆ-ի կողմից ռուս քաղաքական գործիչ Ալեքսեյ Նավալնիին ֆինանսավորելու մասին լուրերը: Նրա խոսքերով՝ այդ տեղեկությունը չի համապատասխանում իրականությանը: «Նա ամերիկյան նախագիծ է՞: Դա անհեթեթություն է: Նավալնին Նավալնի է, նա մեզնից փող չի ստանում, մենք նրան ոչ մի կերպ չենք աջակցում: Անկեղծ ասած՝ նմանատիպ բոլոր պնդումները վիրավորական են Ռուսաստանի համար»,- ասել է Մաքֆոլը:
Անդրադառնալով ամերիկյան հիմնադրամների կողմից ռուսական ոչ կառավարական կազմակերպություններին ֆինանսավորելու թեմային` դեսպանը նշել է, որ ԱՄՆ-ում էլ որոշ նախագծեր ֆինանսավորվում են Ռուսաստանից: «Վլադիմիր Պուտինը մեծ դրամաշնորհ էր տվել Քենեդիի կենտրոնին: Այսինքն՝ ՌԴ-ից մասնավոր անձը դրամաշնորհ է հատկացրել ամերիկյան կառավարական կազմակերպությանը»,- օրինակ է բերել դեսպանը:
Մաքֆոլի հարցազրույցի մեծ մասը նվիրված էր «վերաբեռնման քաղաքականության» հարցերին: Դեսպանը պատմել է, որ նախագահներ Բարաք Օբամայի և Դմիտրի Մեդվեդևի կառավարման ընթացքում երկրներին հաջողվել է մի շարք հարցերի շուրջ համաձայնեցված դիրքորոշում ունենալ: Մասնավորապես, Ռուսաստանը և ԱՄՆ-ն ստորագրել են ռազմավարական հարձակվողական սպառազինության պայմանագիր, և Ռուսաստանը մտել է ԱՀԿ:
Մաքֆոլի խոսքերով՝ ԱՄՆ-ն մտադիր է կառուցողականորեն համագործակցել Ռուսաստանի հաջորդ նախագահի հետ, եթե վերջինս որոշի, որ շարունակելու է «վերաբեռնման քաղաքականությունը»: Բանակցությունների առանցքային հարցը լինելու է հակահրթիռային պաշտպանության համակարգերի թեման:
