Արդարադատության նախարարությունն առաջիկա տարիներին ձգտելու է հասնել նրան, որպեսզի ՀՀ օրենսդրական բացերի պատճառով ՄԻԵԴ-ում հայկական կողմը որևէ պարտություն չկրի: Այսօր կայացած մամուլի ասուլիսի ժամանակ այս մասին ասաց ինքը`ՀՀ արդարադատության նախարարը:
«Մենք պետք է հասնենք նրան, որ պարտություններ չկրենք, և նոր միայն մտածենք Եվրադատարանի հորդորով օրենսդրական բացերը շտկելու մասին»,- պարզաբանեց նա:
Նախարարը նաև տեղեկացրեց, որ մինչև տարեվերջ պատրաստ կլինի գերատեսչության բոլորովին նոր որակի կայքէջը:
Լրագրողնրից մեկի հարցին` ինչպե՞ս է վերաբերվում էթիկայի նորաստեղծ հանձնաժողովին, նախարարը պատասխանեց. «Դա մի ինստիտուտ է, որը վստահության մակարդակի բարձրացման հաշվին կարող է դրական նշանակություն ունենալ համապատասխան ոլորտների խնդիրների լուծման գործում»:
Անդրադառնալով վաղաժամկետ պայմանական ազատման ենթակա դատապարտյալներին վերաբերող հարցին` Հրայր Թովմասյանը նկատեց, որ Հայաստանում նրանց թիվը մոտ է 5-6 տոկոսի, այն դեպքում, երբ, ասենք, Կանադայում անցնում է 40 տոկոսից. «Միաժամանակ, պետք է հասնել նրան, որ ազատության մեջ հայտնվելու իրավունք չունեցող դատապարտյալները, սողանցքներ փնտրելով, արժանիների փոխարեն դուրս չգան ՔԿՀ-ներից»:
Պատասխանելով լրագրողներից մեկի հարցին`ի՞նչ միջոցներով է արդարադատության նախարարությունը նախանշված ծրագրերը կյանքի կոչելու, Թովմասյանը նկատեց` ինչպես պետբյուջեից հատկացված գումարներով, այնպես էլ գրանտային միջոցներով:
Խոսելով ցմահ դատապարտյալների խնդրի մասին` արդարադատության նախարարը նշեց, որ վերջիններիս թիվը Հայաստանում 104 է: «Երեք միլիոնանոց բնակչություն ունեցող երկրի համար սա իսկապես մեծ թիվ է: Պարզապես պետք է գիտակցել, որ նրանք սխալ գործած անձինք են, որոնց, սակայն, երբեք չի կարելի «երկրորդ սորտի» մարդ համարել»:
Ամփոփելով` արդարադատության նախարարը նկատեց, որ հավաստի չեն այն լուրերը, համաձայն որոնց` անհրաժեշտ կենցաղային ու գույքային պայմանների բացակայության, ինչպես նաև ծանրաբեռնվածության պարագայում ՔԿՀ-ներում դատապարտյալները քնում են հերթով: «Իրականում նման բան չկա: ծանրաբեռնվածություն կա միայն նախնական կալանքի վայրերում»,- հայտարարեց Հրայր Թովմասյանը: