Շվեյցարիայի առողջարանային Դավոս քաղաքում այսօր բացվել է համաշխարհային քաղաքական գործիչների, գործարարների և մտավորական էլիտայի ներկայացուցիչների 42-րդ ամենամյա հանդիպումը Համաշխարհային տնտեսական ֆորումի (ՀՏՖ) շրջանակներում: Ինչպես հաղորդում է РБК-ն, հանդիպման պաշտոնական բացման պատիվը տրվել է Գերմանիայի կանցլեր Անգելա Մերկելին, որը հանդես կգա ծրագրային ելույթով:
Դավոսի ֆորումը կավարտվի 2012 թ. հունվարի 29-ին: Ֆորումի հիմնական թեման այս տարի հայտարարված է «Մեծ տրանսֆորմացիա. Նոր մոդելների ձևավորում»: Ներկայացնելով այդ թեման՝ ՀՏՖ հիմնադիր և նախագահ շվեյցարացի պրոֆեսոր Կլաուս Շվաբը մեկնաբանել է. «Վերջին 3 տարիների ընթացքում աշխարհը ստիպված էր զբաղվել քաղաքականության, տնտեսության և ֆինանսների ոլորտներում ճգնաժամի կառավարմամբ, սակայն մենք տեսադաշտից բաց ենք թողել հիմնական տրանսֆորմացիան, որի մեջ իրականում գտնվում է աշխարհը, և որի ֆոնին որորշումներ կայացնելու սովորական մեթոդները արագորեն հնանում են»:
Նոր մոդելների թվում, որ անհրաժեշտ է մշակել և յուրացնել, Շվաբն առաջարկում է նախևառաջ համաշխարհային կառավարման նոր մոդել, որը պետք է հաշվի առնի աշխարհաքաղաքհական բնույթի տեկտոնական շարժերը, իշխանության կենտրոնի աստիճանական տեղաշարժը Արևմուտքից Արևելք և նոր, ոչ պետական ազդեցության գործակալների ի հայտ գալը: Բացի այդ, ՀՏՖ նախագահն առաջարկել է հանդիպման մասնակիցներին մտածել բազմամշակութային և բազմաէթնիկական աշխարհի նոր մոդելների շուրջը, որոնք հաշվի կառնեն գլոբալացման և տեխնոլոգիական նորարարությունների սոցիալական նշանակությունը:
Մեկնաբանները նշում են, որ առավել նեղ իմաստով, համաշխարհային բիզնեսի և քաղաքականության առաջնորդները կքննարկեն համաշխարհային կապիտալիզմի ապագան: «Իր ներկա ձևով կապիտալիզմը դադարել է բավարարել աշխարհի պահանջները»,- ամփոփել է Շվաբը:
Դավոսի հանդիպումը կընթանա հակակապիտալիստական Occupy շարժման ֆոնին: Չի բացառվում, որ շարժման մասնակիցները կփորձեն հիշեցնել իրենց մասին: Մի քանի տասնյակ մասնակիցներ «Գրավեք ՀՏԿ-ն» կարգախոսով արդեն հավաքվել են հանդիպման վայրի մոտակայքում:
Դավոսում ներկա են պետությունների և կառավարությունների շուրջ 40 ղեկավարներ: Այս տարվա Դավոսի Ֆորումը հավաքել է ռեկորդային թվով մասնակիցների՝ ավելի քան 2600 մարդու, որոնցից 1600-ը ներկայացնում են գործարար շրջանակները: Ֆորումին մասնակցություն կունենան ԱՄՆ ֆինանսների նախարար Թիմոթի Գայթները, Արժույթի միջազգային հինադրամի տնօրեն Քրիստին Լագարդը, Միավորված ազգերի կազմակերպության գլխավոր քարտուղար Պան Գի Մունը, Համաշխարհային բանկի նախագահ Ռոբերտ Զելլիկը: