Կորեայի Ժողովրդա-դեմոկրատական Հանրապետության կառավարությունը վերջին յոթ տարվա ընթացքում առաջին անգամ երկրի բնակիչներին բաժանել է անվճար սննդի փաթեթներ` արևելյան օրացույցով Նոր Տարվա կապակցությամբ: Այս մասին հայտնում է ИТАР-ТАСС-ը:
Հարավային Կորեայի ԶԼՄ-ների տվյալներով՝ փաթեթը պարունակում է բրինձ ու եգիպտացորեն և ունի 3-5 օր պիտանելիության ժամկետ: Սակայն հաղորդվում է, որ ոչ բոլոր շրջաններում են փաթեթները բավարարել: Երկրի որոշ բնակիչներ ստացել են միայն եգիպտացորեն:
Որոշ քաղաքների բնակիչների բաժանվել է նաև ձուկ ստանալու կտրոն, որը, սակայն, որակով զիջում է Հյուսիսային Կորեայի շուկաներում վաճառվող ծովամթերքին:
Կորեայի Ժողովրդա-դեմոկրատական Հանրապետությունում, որը գտնվում է միջազգային պատժամիջոցների տակ, սննդամթերքի խնդիրը միշտ շատ լուրջ է: Վերջին անգամ երկրի կառավարությունը անվճար սննդի փաթեթ էր բաժանել 2005 թվականին: