Այսօր հայտնի դերասան, բանաստեղծ և երգիչ Վլադիմիր Վիսոցկին կդառնար 74 տարեկան: Նրա ծննդյան օրվա կապակցությամբ այսօր Մոսկվայում մի շարք միջոցառումներ կանցկացվեն:
Վիսոցկին ծնվել է 1938 թ. Մոսկվայում: Նա տասնյակ դերեր է խաղացել թատրոնում և կինոյում: Կինեմատոգրաֆիայում նրա ամենահայտնի աշխատանքներից է «Հանդիպման վայրը փոխել չի կարելի», «Փոքրիկ ողբերգություններ», «Ծառայում էին երկու ընկեր» ֆիլմերը և այլն:
Այնուամենայնիվ, Վիսոցկին առավել հայտնի է որպես հեղինակ-կատարող: 2010 թ. Ռուսաստանում անցկացված հարցման համաձայն՝ նա «20-րդ դարի կուռքերի» ցուցակում զբաղեցնում է 2-րդ հորիզոնականը՝ զիջելով միայն Յուրի Գագարինին:
Վիսոցկին մահացել է 1980 թ. հուլիսի 25-ին՝ քնած ժամանակ, Մոսկվայի իր բնակարանում:
Նրա մահվան պատճառների շուրջ տարբեր վարկածներ կան: Որոշ տարբերակների համաձայն ՝ նա մահացել է հանգստացնող միջոցների չարաշահումից, մյուսները հերքում են այս տարբերակը:
