ԱՄՆ-ը համոզված է, որ Սիրիայի նախագահ Բաշար Ալ-Ասադի հրաժարականն անխուսափելի է: Այս մասին, ինչպես հաղորդում է Reuters գործակալությունը, հայտարարել է ԱՄՆ նախագահ Բարաք Օբաման Կապիտոլիումում Կոնգրեսին ուղղված ամենամյա ելույթի ժամանակ:
«Ես չեմ կասկածում, որ Ասադի վարչակարգը շուտով կհամոզվի, որ փոփոխություններ պահանջող ուժերին հնարավոր չէ հաղթել… Ինչպես տեղի կունենան այդ փոփոխությունները՝ հստակ չէ: Սակայն մենք կասկած չունենք, որ հենց այդպես էլ կլինի: Միայն այդ տարածաշրջանում ապրող մարդիկ իրավունք ունեն որոշելու սեփական ճակատագիրը, իսկ մենք մեր հերթին կանենք ամեն բան՝ հիմնական արժեքները, որոնք ծառայում են նաև մեր երկրին, պաշտպանելու համար»,- ասել է Օբաման:
Սիրիայում արդեն 10 ամիս է՝ շարունակվում են բախումները կառավարական ուժերի և ընդդիմության միջև: Այդ ընթացքում, ՄԱԿ-ի վերջին զեկույցի համաձայն, զոհվել է ավելի քան 5000 մարդ:
