Անհայտ անձը Դալասում փորձել է մտնել ԱՄՆ նախկին նախագահ Ջորջ Բուշ կրտսերի տուն:
Ինչպես հաղորդում է Fox News 4 հեռուստաալիքը, դեպքը տեղի է ունեցել հունվարի 24-ին. անհայտ անձը փորձել է դարպասներից մտնել տանը հարող տարածք այն պահին, երբ դարպասների դռները բացվել են, և ներս է մտել ԱՄՆ գաղտնի ծառայությունների մեքենան:
Տղամարդը ձերբակալվել է և հարցաքննվել, որի ընթացքում հայտարարել է, թե պատրաստվում էր Բուշի տնից ինչ-որ իր վերցնել: Նրա խոսքերով՝ դա իրեն խնդրել է հենց Բուշը՝ տելեպատիկ ուղերձ ուղարկելով:
Հարցաքննության ժամանակ տղամարդը նաև խոստովանել է, որ ոչ հեռու կայանած իր մեքենայում հրաձգային զենք կա: Agence France-Presse-ը նշում է, որ նա զենք պահելու իրավունք ունեցել է, ուստի հարցաքննությունից հետո տղամարդուն բաց են թողել՝ նրա դեմ որևէ մեղադրանք չներկայացնելով:
Նշվում է, որ Բուշը և նրա կինը՝ Լորան, միջադեպի ժամանակ տանը չեն եղել:
