Երեկ կայացավ Անգլիայի առաջնության 19-րդ տուրի կենտրոնական հանդիպումը. «Էմիրեյթս» մարզադաշտում «Արսենալ»-ն ընդունեց «Չելսի»-ին և վերջապես կարողացավ հաղթահարել վերջին տարիներին ձևավորված բարդույթը: 11 անընդմեջ խաղերում «Ազնվականներ»-ը չէին պարտվել Վենգերի սաներին: Արդեն բոլորս սովորել ենք, որ «Արսենալ»-ը հեշտությամբ հաղթում է իրենից ավելի ցածր կարգ ունեցող թիմերին, բայց ոչ մի կերպ չի կարողանում հաղթահարել «Չելսի»-ի և «Մանչեսթր Յունայթեդ»-ի արգելքը:
Առաջին խաղակեսում Անչելոտտիի սաներն ընդամենը մեկ վտանգավոր գրոհ կարողացան կազմակերպել, բայց Դրոգբայի հարվածը շեղ ստացվեց, իսկ «Արսենալ»-ի հետզհետե ահագնացող գրոհներն իրենց արդյունքը տվեցին 44-րդ րոպեին. խառնաշփոթ իրավիճակում ճիշտ կողմնորոշվեց կամերունցի Ալեքսանդր Սոնգը: Երկրորդ խաղակեսից 6 րոպե անց Թեո Ուոլկոտն օգտվեց Էսիենի սխալից և մեն մենակ հայտնվեց Չեխի դեմ, բայց չհարվածեց, նախընտրեց փոխանցում կատարել Ֆաբրեգասին, որն էլ գրավեց անպաշտպան դարպասը: Մեծահոգության համար Թեոն շուտով պարգևատրվեց. 2 րոպե անց արդեն Սեսկը ճշգրիտ փոխանցումով նրան դուրս բերեց հարվածային դիրք, և հաշիվը դարձավ 3:0: Հանդիպման 57-րդ րոպեին Բրանիսլավ Իվանովիչը կարողացավ կրճատել հաշվի տարբերությունը, բայց դրանից հետո «Չելսի»-ն մի քանի անգամ հրաշքով փրկվեց խոշոր հաշվով պարտությունից: «Արսենալ»-«Չելսի»` 3:1: