Կենտուկի նահանագը ներկայացնող սենատոր Ռենդ Փոլին Նաշվիլայում թույլ չեն տվել նստել ինքնաթիռ, քանի որ նա հրաժարվել է անցնել անձնական ստուգման գործընթացը: Այս մասին հայտնում է The Los Angeles Timesը: Ռենդ Փոլը կոնգրեսական Ռոն Փոլի որդին է, որը հավակնում է Հանրապետական կուսակցությունից առաջադրվել ԱՄՆ նախագահական ընտրություններում:
Միջադեպը տեղի է ունեցել հունվարի 23-ին, երբ Ռենդ Փոլը թռնում էր Վաշինգտոնից: Օդանավակայանի անվտանգության աշխատակիցները խնդրել են նրան թույլ տալ՝ կրկին ստուգել, քանի որ սքաները ֆիքսել է ինչ-որ կասկածելի իր:
Փոլ կրտեսրի մամուլի քարտուղարը վստահեցնում է, որ դրանից հետո սենատորին տեղափոխել են առանձին վայր և հրամայել սպասել: Տրանսպորտային անվտանգության վարչությունում (TSA) ասում են, որ Փոլին ոչ ոք չի պահել: Վարչության տվյալների համաձայն՝ նրան միայն թույլ չեն տվել ինքնաթիռ նստել: Սենատորը հաջորդ չվերթի տոմս է վերցրել և կրկին սքաների ստուգում անցել (այս անգամ սարքը ոչ մի կասկածելի բան չի գրանցել):
Այս միջադեպի կապակցությամբ հատուկ հայտարարությամբ է հանդես եկել Ռոն Փոլը: Կենգրեսականի խոսքերով՝ «երկրում ոստիկանների պետությունը դուրս է գալիս վերահսկողությունից»: Ռոն Փոլը հայտարարել է, որ տրանսպորտային անվտանգության վարչությունը «բռնում է երեխաներին և ծերերին»` տրանսպորտում չապահովելով անվտանգությունը: Կոնգրեսականն իր պլանում,- եթե, իհարկե, նա իշխանության գա,- առաջարկում է վերացնել TSA-ն` մի շարք դաշնային գերատեսչությունների հետ միասին: Փոլի կարծիքով՝ օդանավակայաններում անվտանգությունը պետք է ապահովեն նրանք, ում պատկանում է համապատասխան սեփականությունը:
Սպիտակ տան մամուլի քարտուղար Ջեյ Քարնին հավանություն է տվել TSA-ի գործողություններին: Նրա խոսքերով՝ ուղևորը, որը հրաժարվում է ամբողջությամբ անցնել ստուգման գործընթացը, չի կարող մուտք գործել ինքնաթիռ: Քարնին նաև ընդգծել է, որ Ռենդ Փոլին ոչ ոք չի պահել:
