Ըստ հատուկ քննչական ծառայության տարածած հաղորդագրության` «Սեյսմիկ ռիսկի նվազեցման ծրագրի աջակցման կենտրոն» հասարակական կազմակերպության տնօրեն Ալվարո Անտոնյանը Ֆրանսիայի ատոմային էներգիայի կոմիսարիատի շրջակա միջավայրի վերահսկողության և վերլուծության դեպարտամենտի ներկայացուցչի հետ 2008 թվականի հուլիսի 10-ին կնքել է փոխըմբռնման հուշագիր: Հուշագրով նախատեսվել է Վայոց Ձորի մարզում երկկողմանի ֆինանսավորմամբ կառուցել նորագույն սեյսմիկ կայանների ցանց: Սակայն ֆրանսիական կողմի ներկայացուցիչները, ըստ հատուկ քննչական ծառայության հաղորդագրության, հակառակ սկզբնական պայմանավորվածության, ստանձնել են ծրագրի լրիվ ֆինանսավորումը և 2009 թվականի օգոստոսին աշխատանքներն իրականացնելու համար անհրաժեշտ գումարի մի մասը՝ 70 հազար եվրո են փոխանցել Ալվարո Անտոնյանի ղեկավարած ՀԿ-ի հաշվեհամարին: Այժմ հատուկ քննչական ծառայությունը արտակարգ իրավիճակների նախարարության սեյսմիկ պաշտպանության ազգային ծառայության պետ Ալվարո Անտոնյանին մեղադրում է 3 միլիոն 324 հազար դրամ (մոտ 9200 դոլար) յուրացնելու մեջ: Քրեական գործն արդեն ուղարկվել է Վայոց Ձորի մարզի ընդհանուր իրավասության դատարան: