Հայաստանի, Ռուսաստանի և Ադրբեջանի նախագահների` երեկ Սոչիում կայացած հանդիպման ամենամեծ ձեռքբերումը բանակցային գործընթացի շարունակականությունն ապահովելն էր: Այսօր կայացած մամուլի ասուլիսի ժամանակ այս մասին ասաց «Կովկաս» ինստիտուտի փոխտնօրեն, քաղաքագետ Սերգեյ Մինասյանը:
«Ամենակարևորը` ընդունված համատեղ հայտարարությունը վկայում է այն մասին, որ բանակցային գործընթացը շարունակվելու է, հակամարտող կողմերը աշխատելու են նվազեցնել շփման գծում հրադադարի ռեժիմի խախտման դեպքերը, հումանիտար շփումների եզրեր են փնտրելու:
Հայտարարության այն հատվածը, ուր նշվում է, որ կողմերը պետք է հրաժարվեն իրենց մաքսիմալիստական պահանջներից, նշանակում է, որ պատերազմի` որպես հակամարտության մաքսիմալիստական ելքի հավանականությունը փոքրանում է»,- նկատեց քաղաքագետը:
Մինասյանի խոսքով` Մինսկի խմբի ձևաչափը կշարունակվի, իսկ Ռուսաստանն էլ կփորձի մյուս համանախագահողների համեմատ ավելի մեծ հետաքրքրվածություն ցուցաբերել խնդրի կարգավորման հարցում:
«Ակնհայտ է, որ Ռուսաստանն իր ձեռքից կամովին բաց չի թողնի հակամարտության լուծման վրա ունեցած իր լծակները: Միաժամանակ, ով էլ լինի Ռուսաստանի նախագահը, դժվար թե նույնքան շահագրգռվածություն ցուցաբերի հակամարտության կարգավորման հարցում, որքան Դմիտրի Մեդվեդևը»,- ասաց քաղաքագետը:
Ամփոփելով` Սերգեյ Մինասյանը չբացառեց, որ երեք երկրների նախագահների հանդիպումների ձևաչափը հետագայում կարող է վերափոխվել երկու նախագահների և մեկ վարչապետի հանդիպումների ձևաչափի:
Նշենք, որ Սարգսյան-Մեդվեդև-Ալիև հանդիպումը Սոչիում տեղի էր ունեցել երեկ: Հանդիպումից հետո երեք երկրների ղեկավարները համատեղ հայտարարություն էին տարածել: