Ֆրանսիայի Սենատում երեկ ընդունված Հայոց ցեղասպանությունը քրեականացնող օրինագիծն արտահայտում է ֆրանսիական հասարակության հակաիսլամական տրամադրությունները: Այսօր կայացած մամուլի ասուլիսի ժամանակ այս մասին ասաց «Կովկաս» ինստիտուտի փոխտնօրեն, քաղաքագետ Սերգեյ Մինասյանը:
«Ֆրանսիական Սենատի այս որոշումը շատ մեծ նշանակություն կունենա ԵՄ մյուս երկրների քաղաքական և իրավական որոշումների համար: Միաժամանակ հասկանալի էր, որ այս օրինագիծը չէր ընդունվի, եթե չլիներ Ֆրանսիայի նախագահ Նիկոլա Սարկոզիի քաղաքական կամքը:
Ցեղասպանության հարցը նյարդայնացնում է Թուրքիային, և մեր ձեռքում պայքարի լավ ռեսուրս է: Հնարավոր է, որ ֆրանսիական Սենատի` օրինագծի ընդունումից հետո մենք ունենանք հայ-թուրքական ավելի կոշտ հարաբերություններ: Եթե Թուրքիայի ժխտողական քաղաքականությունը շարունակվի, չի բացառվում, որ մի քանի տարի անց Ֆրանսիայում ընդունվի Ցեղասպանության ժխտման դեմ մեկ այլ օրինագիծ`ավելի շատ տուգանք վճարելու սկզբունքով, քան այժմ է»,- ասաց Մինասյանը:
Քաղաքագետի խոսքով` չի բացառվում, որ Ֆրանսիան իր այս որոշումը փորձի տարածել ԵՄ տարբեր կառույցներում: «Կարծում եմ` Ցեղասպանության ճանաչումը Թուրքիայի` ԵՄ անդամակցության պարտադիր պայման կդառնա»,- ասաց Մինասյանը:
Նշենք, որ երեկ` հունվարի 23-ին, Ֆրանսիայի Սենատում Հայոց ցեղասպանության ժխտման համար քրեական պատասխանատվության ենթարկելու մասին օրինագիծն ընդունվել էր ձայների բացարձակ մեծամասնությամբ:
