«ՀԺ»-ն գրում է, որ հունվարի 19-ին կալանավորված Բանգլադեշցի Համո մականվամբ հայտնի Աշոտ Ավետիսյանի տանը խուզարկություն է կատարվել:
«Ոստիկանության հասարակայնության հետ կապերի և լրատվության վարչությունից երեկ մեզ հայտնեցին, որ խուզարկության ընթացքում նրա բնակարանում որևէ անօրինական բան չի հայտնաբերվել և չի առգրավվել»,- ապա թերթը հավելում է.
«Այս տեղեկությունն ուշագրավ է մի քանի պատճառով. այն գործը, որի շրջանակներում Բանգլադեշցի Համոն կալանավորված է, տրամաբանորեն խուզարկության կարիք չի զգում: Տեղի է ունեցել վթար, որից հետո, ըստ նախաքննության մարմնի, Համոն ծեծի է ենթարկել մի քաղաքացու և տեղում ձերբակալվել:
Այսինքն՝ նա չէր կարող տվյալ հանցագործության հետ առնչություն ունեցող որևէ բան պահած ունենալ տանը: Ենթադրվում է, որ խուզարկություն կատարելիս ոստիկանները բոլորովին այլ բան են փնտրել: Մեր աղբյուրները տեղեկացնում են, որ խուզարկության արդյունքում բավական հետաքրքիր նյութեր են գտնվել, որոնք, ճիշտ է, տվյալ գործի հետ չեն առնչվում, բայց մեծ հավանականությամբ առաջիկայում կօգտագործվեն քաղաքական նպատակներով:
Ու քանի որ տվյալ պահին դրանք օգտագործելու քաղաքական խնդիր դրված չէ, ոստիկանությունն արձանագրում է, թե խուզարկության արդյունքում որևէ ապօրինի բան չի գտնվել և չի առգրավվել»: