«168 ժամ»-ի հարցին, եթե ԲՀԿ-ն մեծամասնական բոլոր 41 ընտրատարածքներում թեկնածուներ առաջադրի, դա կարո՞ղ է մեծ լարվածություն առաջացնել, Աժ նախագահ Սամվել Նիկոյանը պատասխանել է.
«ԲՀԿ-ն նաև ասում է, թե իրենք կողմ են 100 տոկոս համամասնական ընտրակարգին: Եթե միաժամանակ հայտարարում է. որ առաջադրելու Է բոլոր ընտրատարածքներում, նշանակում է որ կլինի պայքար»:
«ԲՀԿ պատգամավոր Նաիրա Զոհրաբյանը չէր բացառել, որ 41 ընտրատարածքներում էլ թեկնածուներ կունենան: Արդյոք դա չի՞ հակասում կոալիցիոն հուշագրին, որտեղ նշված է, թե կոալիցիոն կուսակցությունները նպատակ չունեն գալիք Աժ ընտրություններում իրենց քաղաքական կշիռն ավելացնել միմյանց դեմ պայքար ծավալելու և կոալիցիայի ներսում ուժերի հարաբերակցությունը փոխելու հաշվին»,- թերթի դիտարկմանը Նիկոյանը պատասխանել է.
«Կոալիցիոն 3 կուսակցությունների ստորագրած այդ հայտարարությունը քաղաքական փաստաթուղթ է: Եվ այնքանով, որքանով քաղաքական ուժերը հավատարիմ կլինեն իրենց ստորագրություններին, հավատարիմ կլինեն նաև իրենց խոսքին և գործին: Իսկ հանրությունը նաև դրանով կարող Է գնահատական տալ քաղաքական ուժերին»:
Նիկոյանն անդրադարձել է նաև մամուլում իր մասին գրված լուրերին.
«Երբ ես դեռ Աժ փոխնախագահ էի, բազմաթիվ անգամ մամուլում եղել են ստահոդ և վարկաբեկիչ նման հրապարակումներ: Եվ երբ կուսակցությունը որոշեց ինձ առաջադրել ԱԺ նախագահի պաշտոնում, այդ պահից ինձ համար ակնհայտ էր, որ նման անազնիվ մոտեցումները ոչ միայն շարունակվելու են, այլև նոր թափ են ստանալու: Իհարկե, դա տհաճ է, բայց չի կարող որևէ ազդեցություն գործել իմ տրամադրության վրա:
Պարբերաբար խոսվում է, որ ես տեղափոխվել եմ կամ պատրաստվում եմ տեղափոխվել Կառավարական առանձնատները, որովհետև ԱԺ նախագահի համար շինություն կա հատկացված: Բազմաթիվ անգամ պատասխանել եմ, որ ես չեմ տեղափոխվել և չեմ պատրաստվում տեղափոխվել: Ինչ է, ես ընկնեմ այդ ստահոդ տեղեկությունների հերքումների հետևի՞ց: Իմ ժամանակը դրան չի բավարարի: Նախկինում և հիմա էլ այդ բոլոր հրապարակումների ճանապարհային քարտեզն ինձ համար ակնհայտ է: Կարծում եմ, որ լրագրողների համար էլ դա գաղտնիք չէ, որովհետև շատ փոքր երկրում ենք ապրում, բոլորը բոլորին ճանաչում են, և բոլորս էլ հասկանում ենք՝ յուրաքանչյուր ստահոդ հոդվածի հետևում կան կատարողներ և պատվիրատուներ, և բոլորի ականջներն էլ երևում են: Բայց ես ուզում եմ ասել հետևյալը՝ պարոնաʹյք, բացի դիմացինին վատություն անելու և սևացնելու ձգտումներից կան նաև շատ լավ ու պիտանի անելիքներ»: