«Ժողովուրդ»-ը գրում է.
«Կոտայքի մարզի Հրազդան քաղաքում փետրվարի 12-ին կայանալիք քաղաքապետի ընտրություններից առաջ մարզպետ Կովալենկո Շահգալդյանը՝ Կովալը, արդեն իր «դերի» մեջ Է մտել: Եվ քանի որ Կոտայքի մարզում նա ռեալ ձայներ հավաքելու հնարավորություն չունի նույնիսկ ֆինանսական լծակներն օգտագործելու դեպքում, ուստի Կովալը բացահայտ կերպով ահաբեկչություն Է սկսել Հրազդանում:
10 տարի աշխատելով Հրազդանի քաղաքապետի պաշտոնում՝ Արամ Դանիելյանը հասցրել Է վաստակել բնակիչների բացահայտ ատելությունը միայն, ուրիշ ոչինչ:
Շարունակենք թվարկել մարզպետի ահաբեկչական գործողությունների շղթան: «ժողովուրդ»-ը տեղեկացավ, որ Շահգալդյանն օրերս ժողով է հրավիրել մարզպետարանում, որտեղ ներկա են եղել Հրազդանի բոլոր դպրոցների տնօրենները, որի ժամանակ «չորով» հրահանգել է. «Չլսեմ-չիմանամ, որ ինչ- որ մեկդ Սասունի համար աշխատել եք կամ էլ նրան ձայն եք տվել, ով որ Արամի համար ձայն չտվեց, կորցնում է իր աշխատանքը»:
Կովալը ոչ միայն բացահայտ ահաբեկում է հրազդանցիներին, այլև տարբեր դպրոցներից մոտ 10 ուսուցիչ է «ընտրել», որոնք գումարի դիմաց դասերի ավարտից հետո գնում են բնակարաններ և բացահայտ քարոզչություն կատարում գործող քաղաքապետի օգտին: Այն դեպքում, երբ քարոզարշավը դեռ չի սկսվել: Ուսուցիչներն անգամ խաբել են բնակիչներին, թե ընդամենը սոցիալական հարցումներ են անցկացնում, մինչդեռ ուսումնասիրում են բնակիչների տրամադրությունները, որպեսզի մարզպետը գտնի նրանց վրա ազդելու լծակները:
Հրազդանի ջէկ-ի տնօրեն Աշոտ Մանուկյանին ևս Կովալը զգուշացրել է, որ իր աշխատակիցներին հրահանգի՝ չհամարձակվեն ընտրել Սասուն Միքայելյանին կամ որևէ կերպ օգնել նրան: Նույն հրահանգը տրվել է նաև «Հայաստանի էլեկտրական ցանցեր» ընկերության Հրազդանի մասնաճյուղի տնօրենին, որը ևս պետք է ամեն ջանք գործադրի, որպեսզի իր աշխատակիցները Սասուն Միքայելյանի կողմը չանցնեն: Իսկ նրանք, ովքեր Միքայելյանի կողմնակիցներն են, պետք է աշխատանքից ազատվեն:
Այս ընթացքում մարզպետն ակտիվ համագործակցում է նաև ոստիկանության հետ՝ անհրաժեշտ տեղեկատվություններ տալով նրանց, որպեսզի «բռնեն» քաղաքացիներին: Ինչ վերաբերում է պետական ծառայողներին, ապա նրանք ևս բացահայտ քարոզչություն են անում: Նրանք, պետական միջոցները սեփական համարելով նաև ընկնում են տնետուն և թուղթ ու գրիչը ձեռքներին՝ հարցնում են՝ ինչի կարիք ունեք՝ գումարի՞, հողամասի՞, ավտոտնակի՞…
Այնպիսի տպավորություն է, որ Արամ Դանիելյանի պապի հողերն են, 10 տարի քաղաքապետի կարգավիճակով հողերը վաճառելուց հետո հիմա բարիացել է և որոշել տարածքներ բաշխել մարդկանց: Բայց հասկանալի է, որ էլի խաբելու է»,- ապա թերթը հավելում է.
«Տեղեկացնենք, որ Հրազդանում այս օրերին մի հարց է հնչում. «Դուք մեզ դե՞մ եք», եթե ինչ-որ մեկը փորձում է ասել այո՛, հայտարարում են, որ ուրեմն իշխանությանն եք դեմ՝ դրանից բխող բոլոր հետևանքներով:
Այսինքն՝ 1941 թվականի բռնապետության տարիների ձևով փորձում են ընտրություն անցկացնել:
Եվ այս ամենն արվում է Հանրապետական կուսակցության անվան տակ: Պատկերացնո՞ւմ եք, թե այդքանից հետո ՀՀ քաղաքացիներն ինչ են մտածում իշխող այդ կուսակցության մասին և ինչ բառերով են արտահայտվում՝ թեկուզ թաքուն»: