Ինչպես նախորդ տարիներին, այս տարի ևս ԱԺ նախագահ Հովիկ Աբրահամյանը Ամանորի առթիվ կազմակերպել է ընդունելություն և դեկտեմբերի 29-ին Ազգային ժողով հրավիրել զանգվածային լրատվամիջոցների գլխավոր խմբագիրներին: Քանի որ բազմաթիվ ԶԼՄ-ների գլխավոր խմբագիրներ ստորագրել են «Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանին ազատ արձակելու պահանջի ներքո և մասնակցել ի պաշտպանություն նրա կազմակերպվող ակցիաներին, «Առաջին լրատվական»-ը հետաքրքրվեց՝ մասնակցելո՞ւ են, արդյոք, ԱԺ նախագահի հրավիրած նախաամնորյա ընդունելությանը, թե՞ոչ: Ներկայացնում ենք այն խմբագիրների պատասխանները, որոնք արձագանքել են մեր հարցմանը: «Ժամանակ» թերթի գլխավոր խմբագիր Արման Բաբաջանյանն ասաց, որ քանի դեռ Նիկոլն անազատության մեջ է, ինքը ԱԺ նախագահի հրավերին չի արձագանքի և այնտեղ անելիք չունի: «Ես չեմ գնալու հենց այն պատճառով, որ մեր գործընկերը` Նիկոլ Փաշինյանը, անազատության մեջ է հայտնվել անարդարացիորեն»,- «Առաջին լրատվական»-ի հարցին ի պատասխան ասաց «Լրագիր» ինտերնետային կայքի գլխավոր խմբագիր Հայկազն Ղահրիյանը: «Ես ընդհանրապես չեմ սիրում մասնակցել պաշտոնական ընդունելություններին և չեմ մասնակցելու ԱԺ նախագահի այս մի ընդունելությանը ևս: Դա Նիկոլի հետ չեմ կապում և չեմ համարում, որ այդ կերպ ակցիա եմ անելու: Եթե ակցիա անելու հարց լիներ, այնքան բան կա ակցիա անելու»,- մեր հարցին այսպես արձագանքեց «Հրապարակ» թերթի գլխավոր խմբագիր Արմինե Օհանյանը: «168 ժամ» թերթի գլխավոր խմբագիր Սաթիկ Սեյրանյանը, պարզվում է, ԱԺ նախագահից հրավեր չի ստացել, որպեսզի որոշի` մասնակցելո՞ւ է նրա նախաամանորյա ընդունելությանը, թե՞ ոչ: «Առավոտ» թերթի գլխավոր խմբագիր Արամ Աբրահամյանն էլ ասաց, որ դեռ չի որոշել` մասնակցելո՞ւ է, թե՞ ոչ: «Նիկոլի` բանտում լինելու հանգամանքը և Ամանորի ընդունելությունը իրար հետ կապ չունեն»,- ասաց նա:
