ԼՂ բանակցային գործընթացը խնդրի անարյուն, առանց պատերազմի լուծելու միակ հնարավորությունն է: «Առաջին լրատվականի»-ի հետ զրույցում այս մասին ասաց «Հանրապետություն» կուսակցության ղեկավար Արամ Զավենի Սարգսյանը:
«Անկախ Հայաստանի ու Ադրբեջանի նախագահների՝ Սոչիում կայացած հանդիպման ձևից և ընդունված որոշումներից ելնելով՝ ողջունում եմ նրանց միջև տեղի ունեցող բանակցությունները»,- ասաց նա:
Արամ Սարգսյանի խոսքով, ինքը հակամարտության լուծման միակ մարմին տեսնում է ԵԱՀԿ Մինսկի խումբը: «Ինչ վերաբերում է սահմանին միջադեպերի կանխման սկզբունքին հավատարիմ մնալուն, ապա յուրաքանչյուր երկրի նախագահ պետք է գնահատի իր ստորագրության արժեքը: Եթե նրանք ուզում են, որ խնդիրը լուծվի, պետք է նախ դիպուկահարները դուրս բերվեն սահմանից, ինչից հետո էլ իրենց ստորագրություններն արժեք ու հեղինակություն կունենան: Հիմա ոչ ոք չի հավատում, որ հանդիպումներն արդյունք են տալիս»,- ասաց Արամ Զավենի Սարգսյանը:
Նշենք, որ Սոչիում այսօր կայացած Սարգսյան-Մեդվեդև-Ալիև հանդիպումից հետո համատեղ հայտարարություն է ընդունվել: Երեք երկրների ղեկավարներն ընդգծել են ԼՂ հակամարտության կարգավորման ուղղությամբ իրականացված աշխատանքի մեծ ծավալը՝ սկսած 2008 թ. նոյեմբերի 2-ի նրանց հանդիպումից, երբ ընդունվեց Մոսկովյան հռչակագիրը: Նախագահները հայտարարել են, որ ինտենսիվ բանակցությունների արդյունքում առաջընթաց է ձեռք բերվել ԼՂ կարգավորման Հիմնարար սկզբունքների համաձայնեցման շուրջ: