Ադրբեջանական Turan լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովը մեկնաբանել է այսօր Սոչիում կայացած Հայաստանի, Ադրբեջանի ու Ռուսաստանի նախագահների եռակողմ հանդիպումը, որը նվիրված էր ղարաբաղյան հակամարտության կարգավորմանը.
«Հայաստանի ու Ադրբեջանի նախագահները Սոչիի եռակողմ հանդիպման ժամանակ ընդունեցին իրենց մաքսիմալիստական դիրքորոշումներից նահանջելու անհրաժեշտությունը՝ բանակցային գործընթացում առաջընթաց ապահովելու համար։
Հանդիպման ժամանակ կողմերը մտքեր են փոխանակել կոնկրետ բարդ թեմաների շուրջ և կողմ են արտահայտվել իրենց դիրքորոշումները մոտեցնելուն ուղղված ջանքերի գործադրման շարունակմանը։ Նրանք քննարկել են այն բոլոր հարցերը, որոնք դեռևս մնում են չհամաձայնեցված՝ «հիմնարար սկզբունքների» նախագծի շրջանակներում։
Նախագահները պատրաստակամություն են հայտնել արագացնել «հիմնարար սկզբունքների» շուրջ տարվող աշխատանքները, որպեսզի դա ավարտելուց հետո այդ բազայի հիման վրա անցում կատարեն իրավաբանորեն պարտադրող խաղաղության համաձայնագրի մշակմանը։ Հայաստանի ու Ադրբեջանի նախագահները միջնորդական խնդրանքով դիմել են Ռուսաստանի նախագահին՝ երկու երկրների միջև հումանիտար կապերի հաստատման համար։ Դմիտրի Մեդվեդևը բնականաբար տվել է իր համաձայնությունը։
Նրանք նաև քննարկել են շփման գծում գրանցվող միջադեպերի հետաքննման հարցը, որի մասին ԵԱՀԿ Մինսկի խմբի համանախագահները կազմել են զեկույց»։
