ԵԽԽՎ-ում Հայաստանի խորհրդարանական պատվիրակության «Ժառանգություն» խմբակցության ներկայացուցիչ Զարուհի Փոստանջյանը ԵԽԽՎ հունվարյան նստաշրջանի լիագումար նիստում Հայաստանի վերաբերյալ քննարկումներն անհավանական է համարում: «ԵԽԽՎ հունվարյան նստաշրջանը բաղկացած է և լիագումար նիստերից, և մոնիտորինգի հանձնաժողովի նիստերից, ինչպես նաև այլ հանձնաժողովների նիստերից: Լիագումար նիստի օրակարգում, այս պահի դրությամբ, միանշանակ կարող եմ փաստել, որ Հայաստանի հարցը ընդգրկված չէ, և լիագումար նիստերի ընթացքում չի էլ ընդգրկվի, որովհետև դրա համար անհրաժեշտ է համազեկուցողների կողմից կազմված զեկույց 2009 թվականից առ այսօր տեղի ունեցող դեպքերի վերաբերյալ, որը, ցավոք սրտի, այս պահի դրությամբ գոյություն չունի: Հետևաբար, լիագումար նիստում այդ հարցի քննարկումը բացառվում է, եթե, Աստված չանի, ինչ-որ աննախադեպ իրադարձություններ տեղի չունենան Հայաստանի Հանրապետությունում»,- Առաջին լրատվականի հետ զրույցում կարծիք է հայտնել Զարուհի Փոստանջյանը:
Սակայն, նրա ասելով, չի բացառվում, որ Հայաստանի մասով քննարկումներ տեղի ունենան՝ կապված խոսքի ազատության և մարդու իրավունքների հարցերի հետ: