«Ցավոք, 2010-ը դարձավ չարդարացված հույսերի տարի և ավելին, Աստանայի ԵԱՀԿ գագաթնաժողովը հաստատեց մեր մտավախությունները»,- նման կարծիք է հայտնել ադրբեջանցի քաղաքագետ Էլդար Նամազովը՝ մեկնաբանելով 2010-ի արդյունքները ղարաբաղյան հակամարտության համատեքստում։ Այս մասին տեղեկացնում է Day.Az-ը:
Ադրբեջանցի քաղաքագետի կարծիքով, եթե միջազգային հանրությունը ցանկանա տարածաշրջանում զսպել լարվածությունը և պատերազմի սպառնալիքը, ապա, անկասկած, պետք է ընդունի ԵԱՀԿ ՄԽ համանախագահների առաջարկը և անցնի կարգավորման փուլային ծրագրի վրա հիմնված հաշտության համաձայնագրի նախապատրաստմանը։ «Կարծում եմ, որ հակամարտության խաղաղ լուծման այլ ուղիներ չկան: Փաթեթային տարբերակն ընդունելի չէ ոչ թե այն պատճառով, որ դուր չի գալիս Ադրբեջանին: Կարելի է կազմել փաթեթային տարբերակ, որը լիովին կհամապատասխանի մեր շահերին, բայց Հայաստանն այն չի ընդունի: Իսկ այն տարբերակը, որով կնախատեսվեր բռնազավթված Լեռնային Ղարաբաղի անկախությունը, անընդունելի է Ադրբեջանի համար»,- ասել է Նամազովը՝ հավելելով, որ փուլային ծրագիրը «ղարաբաղյան հակամարտության լուծման միակ հնարավոր ուղին է»: