Ադրբեջանական Trend լրատվական գործակալությանը տված հարցազրույցի ժամանակ Կարնեգիի հիմնադրամի՝ Կովկասի հարցերով փորձագետ Թոմաս դե Վաալն անդրադարձել է Ղարաբաղյան հակամարտության կարգավորմանը.
«Այս տարի գործնականում որևէ հնարավորություն չկա Ղարաբաղյան հակամարտության կարգավորման հարցում առաջընթաց գրանցելու համար։ Թվում է, թե հակամարտող կողմերից և ոչ մեկն էլ պատրաստ չէ փոխելու նախորդ տարվա հունիսին Կազանում մերժված համաձայնագրի նախագծի շուրջ իր դիրքորոշումը։
Այս տարի լրանում է ԵԱՀԿ Մինսկի խմբի ստեղծման 20-ամյակը։ Բացի այդ, այս տարի ԵԱՀԿ Մինսկի խմբի համանախագահող երկրներում (Ռուսաստան, Ֆրանսիա, ԱՄՆ) տեղի են ունենալու նախագահական ընտրություններ, ինչն ավելացնում է բանակցային գործընթացում առաջընթացի գրանցման վերաբերյալ առկա թերահավատությունը։
Դա նշանակում է, որ 2012 թվականը լինելու այնպիսի տարի, երբ միջնորդները հույսեր պետք է տածեն հակամարտության ղեկավարման և ոչ թե դրա լուծման հետ»։
Հիշեցնենք, որ նախորդ տարվա դեկտեմբերի սկզբին Վաալը հայտարարել էր, որ հակամարտող կողմերից ոչ մեկն էլ լրջորեն չի դիտարկում առաջիկա երկու տարիներին ուժային ճանապարհով Ղարաբաղյան հակամարտության կարգավորման հավանականությունը, քանի որ դա աղետալի հետևանքներ կունենա բոլորի համար։