Հայ ազգային կոնգրեսի ներկայացուցիչները տարեվերջյան կադրային փոփոխություններից հետո պնդում են, որ բռնապետական ռեժիմը տապալվելու է միանգամից, և որ արտահերթ ընտրություններն անխուսափելի են: Որքանո՞վ են իրատեսական այդ կանխատեսումները: Քաղաքագետների միության նախագահ Հմայակ Հովհաննիսյանը իշխանությունների իրականացրած կադրային փոփոխությունները համարում է կադրային «ռակիրովկաներ»: «Գումարելիների տեղերը փոխելիս գումարը չի փոխվում: Պատկերը չփոխվեց»,- «Առաջին լրատվական»-ի հետ զրույցում ասաց Հմայակ Հովհաննիսյանը: Քանի որ վարչակարգը չի կարող անցկացնել իրական բարեփոխումներ, ապա, ըստ Հմայակ Հովհաննիսյանի, նա ստիպված է լինելու 2011թ. գարնանն անցկացնել ԱԺ արտահերթ ընտրություններ: Քաղաքագետների միության նախագահը հիշեցնում է, որ ինքն այդ կանխատեսումն արել էր ավելի վաղ: Նրա կարծիքով, եթե վարչակազմը չգնա այդ քայլին, ապա 2012թ. կայանալիք ԱԺ հերթական ընտրություններից կարճ ժամանակ անց սկսվելու է 2013թ. ՀՀ նախագահի ընտրությունների քարոզարշավը, որի ժամանակ էլ Սերժ Սարգսյանն ու իր վարչախումբը կանգնելու են դժվարությունների առաջ: Հմայակ Հովհաննիսյանը հիշեցնում է, որ ընդդիմադիր Հայ ազգային կոնգրեսը անընդհատ հայտարարել է արտահերթ ընտրությունների անհրաժեշտությունը, քանի որ դա կարող է լինել ստեղծված ճգնաժամից դուրս գալու ելքը: Այդ մասին ՀԱԿ-ը իրազեկել է նաև եվրոպական կառույցներին: ԱԺ արտահերթ ընտրություններ անցկացնելու դեպքում, ըստ Հմայակ Հովհաննիսյանի, ՀՀ առաջին նախագահ Լևոն Տեր-Պետրոսյանը կգլխավորի Հայ ազգային կոնգրեսի նախընտրական ցուցակը: Հմայակ Հովհաննիսյանն ուշադրություն է հրավիրում այն հանգամանքի վրա, որ ԱԺ արտահերթ ընտրությունների ժամանակ իշխանությունները կարող են նույնկերպ «հաղթել» Լևոն Տեր-Պետրոսյանին, ինչպես որ եղավ 2009թ. Երևանի ավագանու ընտրությունների ժամանակ ոմն Բեգլարյան Գագիկի միջոցով: Այդ ընտրությունների ժամանակ, Քաղաքագետների միության նախագահի կանխատեսմամբ, Հանրապետական կուսակցության ցուցակը կարող է գլխավորել Երևանի նորընտիր քաղաքապետ Կարեն Կարապետյանը, և իշխանություններն իրենց հոգեհարազատ մեթոդներով կապահովեն ընտրությունների ցանկալի արդյունք: Իսկ դրանից հետո Կարեն Կարապետյանը կնշանակվի ՀՀ վարչապետ: Հմայակ Հովհաննիսյանը նշեց, որ այդ դեպքում ավելի հեշտ կլինի իշխանությունների համար չեզոքացնել հետընտրական անցանկալի զարգացումները: Հակառակ դեպքում, ըստ Հ.Հովհաննիսյանի, ՀԱԿ-ը իր պայքարի շեշտադրումները դնելու է ավազակապետական ռեժիմի կազմաքանդման վրա: Հ.Հովհաննիսյանը կարծիք հայտնեց, որ ավտորիտար վարչակարգերը փլուզվում են, երբ նրանց նկատմամբ գործադրվում են ճնշումներ ինչպես ներսից` հասարակության կողմից, այնպես էլ դրսից, երբ նրանք չեն կարողանում վերահսկել իրավիճակը:
