Դեկտեմբերի 24-ին Լիբանանում Հայաստանի դեսպանության նախաձեռնությամբ գումարվել է Լիբանան-Հայաստան բարեկամության ասոցիացիայի հիմնադիր ժողովը:
Դեսպան Աշոտ Քոչարյանը ողջույնի խոսքում կարևորել է Ասոցիացիայի ստեղծումը, ներկայացրել Ասոցիացիայի հիմնական նպատակները: Նա հույս է հայտնել, որ հիմնադիր անդամների ջանքերի շնորհիվ հաջորդ տարվա ընթացքում հնարավոր կլինի ծավալել արդյունավետ գործունեություն բոլոր փոխշահավետ ոլորտներում՝ երկկողմ հարաբերությունները զարգացնելու և խորացնելու նպատակով: Այնուհետև քննարկվել են որոշ ընթացակարգային հարցեր՝ կապված Ասոցիացիայի գրանցման և հիմնադիր անդամների պարտավորությունների հետ: Ներկայացվել են առաջարկություններ Ասոցիացիայի խորհրդի անդամների թեկնածուների վերաբերյալ:
Ասոցիացիայի ստեղծման նպատակն է նպաստել երկկողմ հարաբերությունների զարգացմանը` առևտրատնտեսական, զբոսաշրջության, կրթական, մշակութային, առողջապահական և այլ ոլորտներում: Ասոցիացիայի հիմնադիր անդամներն են «Բիբլոս», «Քրեդիտ» և «Աուդի» բանկերի ղեկավարները, Լիբանանի հայտնի գործարարները: Նախատեսվում է, որ Ասոցիացիայի պաշտոնական հիմնադրման մասին կհայտարարվի 2011թ. սկզբին` գրանցման հետ կապված բոլոր ընթացակարգային հարցերն ավարտելուց հետո: