Դեկտեմբերի 27-ին Սիրիայում ՀՀ դեսպան Արշակ Փոլադյանին ընդունել է ՍԱՀ Ժողովրդական ժողովի նախագահ դոկտոր Մահմուդ ալ-Աբրաշը:
Հանդիպման ընթացքում քննարկվել են այս տարվա նոյեմբերին ՀՀ Ազգային ժողովի նախագահի ՍԱՀ պաշտոնական այցի արդյունքները, ինչպես նաև երկկողմ հետաքրքրություն ներկայացնող խնդիրներ: Բացի այդ, կարևորվել է նաև խորհրդարանական դիվանագիտության դերը երկկողմ համագործակցության զարգացման և ամրապնդման գործում:
Հանդիպմանը դեսպանը ՍԱՀ ԺԺ նախագահին է փոխանցել է ՀՀ ԱԺ նախագահ Հովիկ Աբրահամյանի՝ Հայաստան այցելելու հրավերը:
Գոհունակությամբ ընդունելով հրավերը՝ դոկտոր Մահմուդ ալ-Աբրաշը նշել է ՀՀ այցի նախնական ժամկետը՝ 2011թ. փետրվար:
Դեկտեմբերի 22-ին Սիրիայում Հայաստանի դեսպան Արշակ Փոլադյանը հանդիպում է ունեցել Սիրիայի բարձրագույն կրթության նախարար դոկտոր Ղիաս Բարաքաթի հետ:
Հանդիպման ընթացքում քննարկվել են կրթության բնագավառում հայ-սիրիական համագործակցության արդի վիճակը և զարգացման հեռանկարները:
Մասնավորապես, քննարկման առարկա է դարձել «Երկու երկրների միջև կրթական դիպլոմների փոխճանաչելիության մասին» պայմանագրի խնդիրը, որի նախագիծը սիրիական կողմին էր ներկայացվել դեռևս 2006թ.: Նախարարը խոստացել է ուսումնասիրել հարցը, ինչպես նաև ստանալ սիրիական շահագրգիռ գերատեսչությունների կարծիքները և պաշտոնապես տեղեկացնել հայկական կողմին:
Կողմերն անդրադարձել են նաև Հայաստանի մասնավոր բուհերում սովորող սիրիացի ուսանողների կրթական ծրագրերին և կրթության մակարդակին: Դեսպան Փոլադյանն առաջարկել է աշխատանքային խումբ գործուղել Հայաստան՝ խնդիրներին տեղում ծանոթանալու և դրանց լուծման ճանապարհներ գտնելու համար:
Հանդիպմանը քննարկվել է նաև 2010թ. բարձրագույն կրթության բնագավառում համագործակցության Գործնական ծրագրի ժամկետի երկարաձգման հարցը: Ա.Փոլադյանը հրավիրել է Ղիաս Բարաքաթին այցելել Հայաստան՝ Գործնական ծրագիրը տեղում ստորագրելու համար: