«ՆԻԿՕ» ՍՊԸ-ի տարածքում հունվարի 17-ին կրակոցներով ուղղորդված վիճաբանության գործով ձերբակալված երկու անձինք «Առաջին լրատվական»-ի տեղեկություններով այսօր կալանավորվել են: ՀՀ ոստիկանությունից խոստացան մի փոքր ուշ այս առնչությամբ տվյալներ հայտնել: Միջադեպի հաջորդ օրը խուլիգանության մեղադրանքով ձերբակալվել էին Էդգար Նահապետյանը և Նարեկ Մանվելյանը:
Հիշեցնենք, որ հունվարի 17-ին՝ ժամը 16.50-ին, «ՆԻԿՕ» ՍՊԸ նախագահը դիմել էր ոստիկանության Արաբկիրի բաժին և հայտնել, որ ժամը 16.30-ի սահմաններում մի քանի երիտասարդներ փորձել են մտնել Տիգրանյան փողոցում գտնվող «ՆԻԿՕ» կահույքի սրահ, սակայն ինքը թույլ չի տվել, որից հետո երիտասարդները սրահի դիմաց վիճաբանել են իր եղբորորդու հետ, իսկ 10 րոպե անց հնչել են կրակոցներ, ինչի հետևանքով վնասվել են սրահի պատուհանի ապակիները:
Նույն օրը՝ ժամը 18.45-ին, ոտքի հրազենային վնասվածքով հիվանդանոց բուժօգնության էր դիմել 23-ամյա Տիգրան Հ.-ն: Պարզվել էր, որ երիտասարդը վնասվածքն ստացել էր «ՆԻԿՕ» կահույքի սրահի մոտ տեղի ունեցած միջադեպի ժամանակ արձակված կրակոցներից:
Հարուցվել է քրեական գործ ՀՀ Քրեական օրենսգրքի 258 հոդվածի 4-րդ մասի և 235 հոդվածի 1-ին մասի հատկանիշներով: