«Հրապարակ»-ը գրում է, որ նախընտրական այս վճռորոշ շրջանում, երբ կուսակցությունները զբաղված են մարդաորսով և մեկ ձայն փախցնելը լուրջ ձեռքբերում է համարվում, ԲՀԿ շարքերը նոսրանում են:
«Որքան էլ ԲՀԿ-ականները հայտարարում են, թե «խեղճուկրակներն» են լքում կուսակցությունը, որն իրենց համար ողբերգություն չէ, սակայն ակնհայտ է, որ սա ընդամենը մխիթարանք է: Ակնհայտ է, որ նախընտրական շրջանում բոլորը, ատամները սրած, թևքերը քշտած՝ ուզում են իրենց փայը «կպցնել»: Այնպես որ օրինաչափ է, որ այս փուլում կսկսվի առնետավազքն ու ճամբարափոխությունը՝ պայմանավորված տարբեր գայթակղիչ առաջարկներով: Այս գործընթացը ծաղկում է հատկապես ԲՀԿ Արարատի տարածքային կառույցում»,- գրում է թերթը և հավելում.
«Ինչպես փոխանցեցին մեր աղբյուրները՝ նույնիսկ բանը զավեշտի է հասել: Երբ ԲՀԿ-ին հրաժեշտ տվողների հոսքը գրասենյակ մեծացել է, ստիպված են եղել դռները կողպել: Բացել են այն բանից հետո, երբ իրավիճակը հանդարտվել է: Ըստ խոսակցությունների՝ ավելի քան 400 տոմս է վերադարձվել: Եթե հաշվի առնենք, որ փոխքաղաքապետը տարածքային կառույցի ղեկավարն է եղել, հավանական է, որ այսքան համակիր կունենար, որոնք էլ հետևել են նրա քայլին»:
