Հայաստանի փոխվարչապետ, տարածքային կառավարման նախարար Արմեն Գեւորգյանը հոկտեմբերի 6-ին Գեղարքունիքի մարզ այցելության ժամանակ հանձնարարել է մինչեւ ձյան գալը ապամոնտաժել «Սեւան» ազգային պարկի տնօրինության ներքո եւ մինչեւ 1900.25մ նիշն ընկած տարածքում գտնվող 32 շենք-շինությունները: Սեւանի բնապահպանական տեսչության նախկին պետի տեղակալ Հենրիկ Մարտիրոսյանը տեղեկացրեց, որ Սեւանի ափամերձ շրջանում դեռեւս որեւէ ապամոնտաժման աշխատանք չի արվում. «Սերժ Սարգսյանի եւ Մեդվեդեւի գալուց առաջ մի քանի վագոն-տնակ տեղաշարժեցին հետ ու առաջ, ճանապարհներն իբր մաքրեցին, ու վերջ, ուրիշ ոչ մի շինություն չի ապամոնտաժվել: Իսկ ջրի տակ մնացած մի քանի տնակները սեւանցիներն իրենց գումարներով դուրս են հանել, որպեսզի դրանք ինչ-որ կերպ հետագայում օգտագործեն»: Մարտիրոսյանը նշեց, թե անգամ խոսակցություններ չկան, որ առաջիկայում որեւէ բան կանեն, իսկ ջրի տակ մնացած շինությունները շատ վտանգավոր են Սեւանի բուսական եւ կենդանական աշխարհի համար. «Քանի այս իշխանավորներն են, ոչ մի բան էլ չեն անի, որովհետեւ իրենք են գումարները վերցրել եւ մարդկանց թույլատրել շինարարություն անել լճի ափամերձ տարածքում, այսօր ի՞նչ երեսով են այդ մարդուն ասելու քանդի շենքդ, նա էլ իր փողերը հետ կուզի»: Ի դեպ, հոկտեմբերի 20-ին Գլոբալ էկոլոգիական հիմնադրամի եւ ԲՆ նախարարի հանդիպման ժամանակ պարզ դարձավ, որ հիմնադրամը 10 մլն դրամ (մոտ 27 հազ. դոլար) է հատկացնելու Հայաստանին` բնապահպանական խնդիրների լուծման, այդ թվում` Սեւանա լճի էկոլոգիական հավասարակշռության վերականգնման համար: Բնապահպանության նախարար Արամ Հարությունյանն էլ ասել է, թե առաջիկա մեկ ամսվա ընթացքում Սեւանա լճի հարակից տարածքից կապամոտաժվեն բոլոր ժամանակավոր շինությունները, իսկ քարե շինությունները կապամոնտաժվեն ավելի ուշ։
