Հարյուրավոր կանայք, որոնց միացել են նաև տղամարդիկ և քաղաքական գործիչներ, Մալավիի առևտրական մայրաքաղաքում դուրս են եկել ցույցի` բողոքելու այն մարդկանց դեմ, ովքեր քննադատում են կանանց, եթե վերջիններս տաբատ կամ կարճ շրջազգեստ են կրում:
Ցույցին մասնակցած կանանց և աղջիկների մեծ մասը տաբատներով և կարճ շրջազգեստներով են եղել: Ցույցի ժամանակ հնչել է Բոբ Մարլիի No Woman, No Cry երգը, որը մեծ ոգևորություն է առաջացրել: Այս մասին հաղորդում է Associated Press-ը:
Կանանց վրա հարձակվողները պնդում են, որ իրենց զոհերի հագուստը բարոյական արժեքների կորստի նշան է, և որ այդ կանայք մարմնավաճառներ են:
Հիշեցնենք, որ 1963-1994 թվականներին երկրի առաջնորդ Հաստինգս Կամուզու Բանդայի բռնապետության ընթացքում Մալավիում կանանց արգելվում էր տաբատներ կամ կարճ շրջազգեստներ կրել:
Մալավին հարավարևելյան Աֆրիկայի փոքր պետություններից է:
