Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում երկու ամսով երկարացրել է սեպտեմբերին ՀՀ ոստիկանության կողմից վնասազերծված բանդայի անդամ լինելու մեջ մեղադրվող, «Գառնիի Սուրիկի լավաշ» ՍՊԸ սեփականատիրոջ ավագ որդու` Արտյուշա Հակոբյանի կալանքի ժամկետը: Այս մասին «Առաջին լրատվական»-ի հետ զրույցում տեղեկացրեց «Գառնիի Սուրիկի լավաշ» ՍՊԸ սեփականատեր Սուրիկ Հակոբյանը: Հիշեցնենք, որ արդեն երրորդ անգամ է երկարաձգվում Արտյուշա Հակոբյանի կալանքի ժամկետը:
Ըստ Ա. Հակոբյանի պաշտպան Հովիկ Արսենյանի`այս պահի դրությամբ որևէ զարգացում չկա: «Որևէ քննչական գործողություն չի կատարվում, ներկայացված ցանկացած միջնորդության քննարկումն ապօրինի կերպով հետաձգում են»,- նշեց պաշտպանը` հավելելով, որ Արտյուշայի պահանջն է, որ բանդայի անդամների հետ ճանաչում կազմակերպեն, որպեսզի պարզեն՝ իրեն ճանաչո՞ւմ են որպես բանդայի անդամ, թե՞ ոչ, առնչություն ունեցե՞լ է այդ ամենի հետ, թե՞ ոչ:
Նա նաև հավելեց, որ իր պաշտպանյալն իրեն մեղսագրվող արարքներում անմեղ է ճանաչում և հայտարարում, որ որևէ առնչություն և մասնակցություն չի ունեցել բանդայի գործողություններին: Պաշտպանը հույս ունի, որ դրական ելք կլինի:
Հիշեցնենք, որ սեպտեմբեր ամսին ՀՀ ոստիկանության կողմից վնասազերծվեց բանդա, որն իրականացրել էր կողոպուտներ հայտնի անձանց բնակարաններում: Այս գործով մինչ այսօր կալանավորված են Սուրիկ Հակոբյանի երկու որդիները և հարսը: