Քիչ առաջ, Կենտրոն եւ Նորք-Մարաշ վարչական շրջանների ընդհանուր իրավասության դատարանը` նախագահությամբ Մնացական Մարտիրոսյանի, 7 տարվա ազատազրկման դատապարտեց ՀՀ ԱԱԾ Հակահետախուզության գլխավոր վարչության 4-րդ բաժնի պետի տեղակալ Արմեն Տեր-Մինասյանին:
Դատարանը նրան մեղավոր ճանաչեց ՀՀ Քրեական օրենքսգրքի 311 հոդվածի 4-րդ մասի 2-րդ կետով («Կաշառք ստանալը»):
Հիշեցնենք, որ Ա. Տեր-Մինասյանը, աշխատելով ՀՀ ԱԱԾ Հակահետախուզության գլխավոր վարչության 4-րդ բաժնում որպես պետի տեղակալ, նախնական համաձայնության գալով Ռոբերտ Չիլինգարյանի հետ, Ռոբերտ Լաիշյանի օգտին դրսեւորել էր ակնհայտ ապօրինի անգործություն, ինչի համար նրանից անձամբ ստացել էր առանձնապես խոշոր չափերի կաշառք: Մինչ այդ, ամբաստանյալը, օգտվելով իր վերջին խոսքի իրավունքից, դատարանին հայտնեց. «Ես չեմ արել այն, ինչում ինձ մեղադրում են»: