Անկախ Ֆրանսիայի Սենատի իրավական հարցերով հանձնաժողովի օրերս կայացրած որոշումից, Ֆրանսիայի Սենատը հունվարի 23-ին լիագումար նիստում կքննարկի ցեղասպանությունների ժխտումը քրեականացնող օրինագիծը:
Ինչպես «Մեդիամաքս» գործակալությանը հաղորդել է Ֆրանսիայի Հայ դատի գրասենյակի ղեկավար Հրաչ Վարժապետյանը, Սենատում Սոցիալիստների խմբակցությունը (PS), թե նախագահ Նիկոլա Սարկոզիի գլխավորած «Միություն հանուն ժողովրդական շարժման» (UMP) կուսակցության անդամները հայտարարել են, որ կողմ են քվեարկելու երկուշաբթի նախատեսված քվեարկությանը:
«348 սենատորներից բաղկացած Սենատում սոցիալիստներն ունեն 141 մանդատ, Սարկոզիի կուսակցությունը` 132:
Օրինագծին դեմ են արտահայտվել Սենատում փոքրամասնություն կազմող Կենտրոնամետ միությունը, Կոմունիստների և Հանրապետական ու Քաղաքացիական շարժման խումբը, ինչպես նաև Եվրոպական ժողովրդավարական և սոցիալական ժողովի (RDSE)»,- նշել է Հայ դատի գրասենյակի ղեկավարը:
Նրա խոսքով` այս ֆոնի ներքո Սենատում օրինագծի ընդունումը միանգամայն իրատեսական է:
Հրաչ Վարժապետյանը նաև հաղորդել է, որ Ֆրանսիայի նախագահը պատասխան նամակ է ուղարկել Թուրքիայի վարչապետ Ռեջեփ Թայիփ Էրդողանին, որում նշել է, որ օրինագծի քննարկումը Ֆրասնիայի ներքին գործն է և համամարդկային արդարության հարց է: