1933թ. այս օրը Ալեքսանդր Սպենդիարյանի «Ալմաստ» օպերայի ներկայացմամբ բացվեց Օպերայի և բալետի թատրոնը:
Այնուհետև թատրոնը 1939թ. վերանվանվանվեց Ալեքսանդր Սպենդիարյանի անվան օպերայի և բալետի պետական թատրոն, (1956թ.արդեն` ակադեմիական), որի ստեղծագործական գլուխգործոցները դարձան «Ալմաստ» և «Անուշ»1935թ. օպերաների բեմադրությունները։
Երևանի գլխավոր հատակագծի համաձայն` Ալ. Սպենդիարյանի անվան օպերայի և բալետի ազգային ակադեմիական թատրոնի շենքը կառուցվեց քաղաքի հյուսիս-հարավ առանցքի վրա` Հյուսիսային պողոտայի գլխամասում, որտեղ գտնվում էր Գեթսեմանի մատուռը։
Այսօր թատրոնի ճեմասրահում կանգնեցված է խաչքար` ի հիշատակ Գեթսեմանի մատուռի։
Թատրոնի շենքը նախագծվել է 1926-1936թթ. որպես Ժողովրդական տան համալիրի թատրոն (ճարտարապետ` Ալ. Թամանյան)։ Համալիրի նախագիծը չի իրականացվել, սակայն «ժողովրդական տուն»անվանումը պահպանվել է։
Օպերայի և բալետի ազգային ակադեմիական թատրոնի շենքի հանդիսավոր հիմնադրումը կայացել է 1930թ. նոյեմբերի 28-ին։ Ալ. Թամանյանի նախագծի հիմնական գաղափարը մեկ շենքի մեջ ձմեռային (հյուսիսային կողմ) և ամառային (հարավային կողմ) դահլիճները միավորելն էր, որը հնարավոր եղավ իրականացնել ավելի ուշ։ 1939թ. ավարտվեց կառույցի ձմեռային թատրոնի հատվածը, իսկ 1953թ.` ամառայինը, որը վերափոխվեց համերգային դահլիճի (այժմ` Արամ խաչատրյանի անվան համերգասրահ)։
Թատրոնի նախագիծը 1937թ. Փարիզի համաշխարհային ցուցահանդեսում Ոսկե մեծ մրցանակի է արժանացել։ 1978-1980թթ. շենքի մի մասը, իսկ 1981-1983թթ.` համերգային մեծ դահլիճը, հիմնովին վերանորոգվել են (ճարտարապետներ` Գ. Ա. Թամանյան, Յու. Ա. Թամանյան և Գ. Գ. Թամանյան)։
