ՅՈՒՆԵՍԿՕ-ի ավստրիական մասնաճյուղը ավանդական վիեննական պարահանդեսը հանել է երկրի ոչ նյութական մշակութային ժառանգության ցուցակից:
Ինչպես հայտնում է France-Presse գործակալությունը, նման որոշման պատճառը վիեննական 17-րդ պարահանդեսին նեոնացիստական կազմակերպության ներկայացուցիչների մասնակցությունն էր: Նշվում է, որ Գերմանիայի և Ավստրիայի ուլտրաաջերը ամեն տարի պարբերաբար հավաքվում են Վիեննայի ուսանողական ընկերության պարահանդեսին (Wiener Korporationsring Ball):
ՅՈՒՆԵՍԿՕ-ի ներկայացուցիչների խոսքերով՝ նման փաստերը թույլ չեն տալիս, որ վիեննական պարահանդեսները գտնվեն կազմակերպության մշակութային ժառանգության ցուցակում: Պատճառն այն է, որ դա հակասում է այլ մշակույթների նկատմամբ հանդուրժողականության և հարգանքի վրա հիմնված հիմնարար արժեքներին:
Վիեննական պարահանդեսները ընդգրկվել են Ավստրիայի ոչ նյութական մշակության ժառանգության ցուցակում 2010 թվականին: Որպեսզի պարահանդեսը համարվի իսկական վիեննական, միջոցառումը պետք է բավարարի մի շարք պահանջների, մասնավորապես՝ պետք է հետևեն պարահանդեսի անցկացման վերաբերյալ խիստ համաձայնեցված արձանագրություններին:
