Բրիտանական The Times թերթը հրապարակել է 2012 թ. 100 առավել ազդեցիկ և նշանակալից մարդկանց վարկանիշային աղյուսակը, որում առաջին տեղը զբաղեցնում է «Ասեղի վրա» և «Միլիոնատերը ետնախորշերից» ֆիլմերի ռեժիսոր Դենի Բոյլը: Հենց նրան են բրիտանացիները հանձնարարել կազմակերպել Լոնդոնի Օլիմպիական խաղերի բացումը:
Թերթի կայքում տեղադրված վարկանիշային աղյուսակում երևում է, որ տասնյակի մեջ են մտել Գերմանիայի կանցլեր Անգելա Մերկելը, Չինաստանի առաջնորդի տեղակալ Սի Ցզինպինը, Քեմբրիջի դքսուհին, Apple-ի ղեկավարի պաշտոնում Սթիվ Ջոբսին փոխարինած Թիմ Քուքը, գրող Չարլզ Դիկենսը:
Քաղաքական գործիչներից The Times-ի վարկանիշային աղյուսակում հայտնվել են Մեծ Բրիտանիայի վարչապետ Դևիդ Քեմերոնն իր ամբողջ կաբինետով, ԱՄՆ նախագահ Բարաք Օբաման, Իսրայելի վարչապետ Բենյամին Նեթանյահուն, Բրիտանիայի թագուհի Էլիզաբեթ 2-րդը, Ֆրանսիայի նախագահական ընտրություններում Սարկոզիի գլխավոր հակառակորդ Ֆրանսուա Օլանդը, Հյուսիսային Կորեայի առաջնորդ Կիմ Չեն Ունը և Ադրբեջանի նախագահ Իլհամ Ալիևը:
Ֆինանսների և բիզնեսի ոլորտից ամսագիրն առանձնացրել է Գերմանիայի ԿԲ նախագահ Յենս Վայդմանին, ԱՄՀ տնօրեն Քրիստին Լագարդին, Ռուպերտ Մերդոկի դուստր Էլիզաբեթին և Mashable կայքի ղեկավար Փիթ Քեշմորին: Մշակույթի բնագավառից ցուցակում հայտնվել են բրիտանացի դրամատուրգ Թոմ Սթոփփարդը, իռլանդացի դերասան Մայքլ Ֆասսբենդերը, բրիտանացի դերասան Մարտին Ֆրիմանը և The Stone Roses վերամիավորված խումբը:
Ցուցակի վերջին տեղում հայտնվել է Դևիդ և Վիկտորյա Բեքհեմների 6-ամսական դուստրը՝ Հարփեր Սեվենը, որի համար եվրոպացի խոշոր դիզայներները նոր մանկական հավաքածուներ են մշակում:
Հատկանշական է, որ վարկանիշային աղյուսակի 98-րդ հորիզոնականում է հայտնվել ռուս բլոգեր Ալեքսեյ Նավալնին: Թերթը գրում է, որ նա Ռուսաստանի ամենահայտնի բլոգերն է. նա այս տարի «վիրտուալ աշխարհից դուրս կգա քաղաքական թատերաբեմ, որը կարող է հանգեցնել նախագահության»։