Լոս Անջելեսի ոստիկանությունը հինգշաբթի օրը շարունակել է որոնողական աշխատանքները Հոլիվուդի նշանի մոտ` հույս ունենալով գտնել մահացած մարդու մարմնի մնացած մասերը:
Reuters-ը հաղորդում է, որ հայտնաբերված գլխի, ձեռքերի և ոտքերի շուրջ առեղծվածը շարունակվում է, իսկ ոստիկանությունը ենթադրում է, որ այդ բոլոր մարմնամասերը պատկանում են մեկ մարդու:
Գլուխը, ձեռքերն ու ոտքերը այս շաբաթվա ընթացքում հայտնաբերվել են առանձին-առանձին, բայց միևնույն տարածքում:
Լոս Անջելեսի ոստիկանությունը դեռևս չի կարողանում պարզել զոհի ինքնությունը, սակայն ենթադրվում է, որ մահացած տղամարդը 40-ից 60 տարեկան է եղել: Ոստիկանությունը նաև չի կարողանում հայտնել, թե ինչպես է այդ մարդը մահացել:
Ոստիկանության ավելի քան 100 անդամ` ներառյալ քննիչներ, խուզարկուներ, հինգշաբթի օրը շարունակել են որոնումները, որոնք վերսկսվելու են այսօր:
