Սեպտեմբերի վերջին մեծ աղմուկով վնասազերծված բանդայի գործով կալանավորված՝ «Գառնիի Սուրիկի լավաշ» ընկերության սեփականատեր Սուրիկ Հակոբյանի ավագ որդու՝ Արտյուշայի կալանքի ժամկետը վաղը երկու ամսով կերկարացվի: «Առաջին լրատվական»-ի հետ զրույցում այս մասին ասաց ինքը՝ Սուրիկ Հակոբյանը:
«Ավագ որդուս՝ Արտյուշայի կալանքի ժամկետը երկարաձգում են արդեն 4-րդ անգամ: Այս մասին ինձ տեղյակ պահեց նրա պաշտպանը: Վաղը՝ ժամը 14:00-ին, Կենտրոն և Նորք Մարաշ վարչական շրջանների ընդհանուր իրավասության դատարանում էլ կհայտարարեն այդ մասին»,- ասաց նա:
Հարցին՝ այս ամենի մեջ դիտավորություն տեսնո՞ւմ է, Սուրիկ Հակոբյանը պատասխանեց. «Եթե դիտավորություն չի՝ ի՞նչն է պատճառը: Եթե 3 անգամ կալանքի ժամկետն ավելացրել են՝ ոչ մի բան չեն հայտնաբերել, 4-րդ անգամ ի՞նչ նպատակ ունի ժամկետը երկարաձգելը, չեմ հասկանում»:
«Գառնի Սուրիկի լավաշ» ՍՊԸ-ի սեփականատերը նաև նշեց, որ արդեն մի քանի ամիս է՝ չի տեսել կալանքի տակ գտնվող որդիներին, և վաղը լավ առիթ է՝ տեսնելու ավագ որդուն, տեղեկանալու վերջինիս առողջական վիճակի մասին: «Այս ամբողջ ընթացքում ոչ մի անգամ չեմ հանդիպել տղաներիս հետ, բայց վաղը գնալու եմ դատարան: Կարող է թույլատրեն, կարող է՝ չթույլատրեն տեսնել նրանց»։
Հիշեցնենք, որ այս գործով կալանավորված են Սուրիկ Հակոբյանի երկու որդիները և հարսը:
